Poeta, kompozitór no eskritór timor-oan, Abe Barreto Soares. Imajen/Espesiál

DILI, (TATOLI) – Obra, linguista, eskritór no poeta timoroan, Abe Bareto Soares, ho tema “Padang Panjang Sepanjang Pandang” sei lansa hamutuk ho obra literatura seluk husi kontinente Sudeste Ázia hanesan Brunei Darusalam, Indonézia, Singapura, Malázia no Tailándia, iha sidade Sepanjang Pandang, Sumatera Oeste, Indonézia, iha ámbitu sorumutu “TEMU SASTRA PENYAIR ASIA TENGGARA”.

“Hanesan timoroan ida ne’ebé foin dala uluk tuir eventu ne’e, ha’u sente haksolok lori Timor-Leste nia naran, halo naran Timor-Leste nian morin iha Asia Tenggara (sudeste ázia) hosi aspetu poétiku”, katak poeta, Abe Barreto, ba TATOLI via Facebook, ohin, husi Sumatera Oeste, Indonézia.

Poeta no akademista ne’e hatutan durante loron rua, hahú loron 5 to’o 6 maiu, sei halo aprezentasaun kona-ba knananuk Timoroan sira nian no lee mós obra literáriu, husi Kay Rala Xanana Gusmão, Fernando Silvan nomós seluk tan.

“Ha’u-nia poema ida mós tama iha antolojia ida ne’ebé sei lansa iha festival ne’e, alende ne’e, ha’u sei lee poema husi Indonézia nian no rai seluk nian purezemplu husi Amérika Latina no ha’u nian rasik”, katak tan.

Abe espera katak ho eventu ne’e, sei haklaken Timor-Leste perante partisipante seluk husi nasaun kontinente ázia sira ne’ebé mak partisipa iha atividade ne’e.

“Ha’u iha esperansa katak ha’u sei hetan matak malirin literáriu barak husi eventu ne’e husu boot matak malirin ne’e ha’u sei bele haklaken iha ita-nia rain doben”, konklui.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here