Enkontru entre Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur ho Prezidente Repúblika, Francisco Guterres Lú Olo. Imajen Mídia Palásiu PR.

DILI (TATOLI)–Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur hateten situasaun seguransa durante kampaña eleisaun antesipada la’o hakmatek.

“Ami relata situasaun seguransa rai laran ba Prezidente Repúblika. Situasaun kampaña polítika ne’ebé besik ramata, la’o hakmatek,” Lere informa kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e, hafoin enkontru ho Prezidente Repúblika, Francisco Guterres Lú Olo.

Nia haktuir, maski insidente balun akontese durante kampaña maibé laiha gravidade ne’ebé afeta ba estabilidade nasionál.

“Kuaze ita nia povu preokupa ba estabilidade nasaun nian liu-liu preokupa ba rezultadu eleisaun antesipada ne’ebé mai ne’e,” nia dehan.

Maibé, tuir Lere, bainhira iha ona rezultadu ba eleisaun, naran katak lider partidu polítiku sira simu rezultadu ne’e ho fuan boot.

“Partidu ida ne’ebé manán tenke kumpre promesa ne’ebé hato’o durante kampaña no ida ne’ebé lakon tenke kolabora ho Governu para hala’o dezenvolvimentu iha rai ne’e,” lider Forsa Armada ne’e apela.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here