Tempu Ne’e Iha Valór, Aproveita!

0
166
Estudante KS, Ludovino dos Santos hasai foto hamutuk ho embaixador Australia, Peter Doyle. Foto: Eujevio Pereira

DILI, (TATOLI) – Tempu ne’e rotasaun. Husi segundu ba minutu, husi minutu hakat ba oras, hodi sai loron no kalan, fulan ba tinan no ba nafatin. Tanba ne’e, kada segundu no minutu ne’ebé iha, valór tebes, aproveita! Basá, bainhira ita uza didi’ak bele muda buat ne’ebé mak dalaruma difisil sai fásil.

Ne’e mak mensajen, Ludovino dos Santos, estudante Komunikasaun Sosiál, Universidade Nasionál Timor Lorosa’e (UNTL), ne’ebé sai primeiru lugar ba kompetisaun filmajen badak ho tema: “Feto rurál” ne’ebé organiza husi PHD (Partnership for Human Development-Parseiru ba Dezenvolvimentu Umanu), Austrália.

“Hasoru no iha difikuldade ruma, ita tenke pasiénsia nafatin no korajen hodi hasoru no ultrapasa”, vensedora Ludovino dos Santos fó hanoin bainhira TATOLI dadalia iha Kampus Fakuldade Siénsia Sosiál (FSS), Kaikoli, ohin.

Fuan domin husi Ilário da Cruz nu’udar manorin na’in ka profesór no Leopoldina dos Santos nu’udar doméstika ka dona da casa ne’e fó hanoin tan katak atu hetan susesu, keta rende ba dezafiu no problema tanba ne’e nu’udar mestre da vida.

“Problema nu’udar lisaun ba moris, dezafiu nu’udar korajen, ne’ebé presiza pasiénsia, hodi bele ultrapasa. Tanba ne’e, bainhira difisil atu ita hasoru, maibé tanba futuru, dezafiu saida de’it, tenke hasoru hodi bele hakat ba oin”, Ludovino, oan datoluk husi maun-alin na’in lima, feto tolu, mane rua; hanesan Carmelita dos Santos da Cruz (bin), Bonifácio dos Santos da Cruz (maun) nomós nia alin Evilo dos Santos da Cruz ho alin ikun Esperança dos Santos da Cruz ne’e enkoraja.

Estudante ho karakteristika fíziku, altura natoon, isin-morena, fuuk karakoladu ho estilu ala kribo, ne’ebé moris iha Kribas, Manatuto iha loron 10 maiu 1995 ne’e konta, antes sai vensedór, nia nunka imajina hodi hetan rezultadu pozitivu ne’e, maibé esplora de’it kuñesimentu téoriku no kapasidade tékniku ho ekipamentu limitadu, ne’ebé profesór sira iha Komunikasaun Sosiál UNTL, hanorin, motiva no enkoraja iha aula laran.

“Inspirasaun ne’e mai husi profesór sira, liliu profesór Francisco Isménio, ne’ebé sempre motiva, fó hanoin no profesór sira mós enkoraja, fahe esperiénsia ho fuan no domin, iha prosesu estudu tomak to’o partisipa iha kompetisaun nomós to’o ohin loron, hafoin kompetisaun”, haktuir Ludovino.

Nune’e mós, produtu Komunikasaun Sosiál-UNTL, Ludovino dos Santos ne’e fahe esperiénsia katak alende motivasaun mai husi profesór sira, inan-aman, kolega eh belun no seluk tan, nu’udar estudante tenke iha konviksaun, vontade no kompremitidu, orienta tuir prinsípiu hodi buka futuru ho esperansa no domin.

Futuru ida susesu, tuir nia, tenke prepara aan, depois buka oportunidade aproveita, hodi esplora siénsia no kuñesimentu sira ne’ebé hetan iha estabelesimentu ensinu sira, iha prosesu aprendijazen.

“Buat ida susesu mai husi buat rua, primeiru; preparasaun no segundu buka oportunidade. Preparasaun mak tenke prepara aan ho di’ak, aproveita tempu, kada minutu ne’ebé iha, aproveita hodi prepara ita-nia aan; iha oportunidade, iha kompetisaun sira, ita bele partisipa hodi esplora ita-nia kuñesimentu sira, bele ka labele”, motiva Ludovino dos Santos ho zódiaku Taurus ne’e.

Vensedór filmajen badak ne’e, haktuir maske sai vensedór, labele satisfaz no orgullu lalais de’it ho buat ne’ebé iha ona, maibé hakle’an liutan ho aprende bebeik, liuhusi livru, peskiza iha internet, hakbesik aan ba edukadór no ema sira ne’ebé profesionál no esperiensiadu ona.

“Ba futuru, ha’u hanoin ho ekipamentu ne’ebé mak ita iha, la’ós satisfaz lalais de’it ho rezultadu ne’ebé mak hetan ona, maibe esforsu buka aprofunda liutan koñesimentu, eleva tan kapasidade, teóriku no prátika”, Ludovino ekspresa nia sentimentu kuandu sai vensedór, hodi konfirma ba TATOLI.

Filmajen badak ne’ebé, Ludovino foti kona-ba feto rurál ne’e, hodi sai nu’udar nia produsaun, aprezenta ba PHD, nia personajen reprezenta husi Zélia dos Santos husi Munisípiu Bobonaro, Postu Administrativu Balibo, Suku Leolima, Aldeia Doadero Hamlet.

Zélia dos Santos ne’e nu’udar feto rurál ne’ebé hala’o nia kna’ar hanesan mós mane sira tanba nia loke nia negósiu ho fundu pesoál dolár atus lima hodi halo atividade ofisina, loke no taka roda; transporte publiku no privada ne’ebé sirkula ba mai iha, Bobonaro nomós faan nesesidade báziku ba transporte nian.

Atividade ofisina ne’e, Zélia dos Santos, feto rurál ne’ebé nia abilitasaun literária, ensinu sekundária de’it bele sai mekanika ne’e, hala’o dezde 2013 to’o agora, husi dader to’o loraik.

“Ha’u loke ofisina ne’e, la’ós ha’u aprende oinsá atu sai mekanika, ha’u gosta duni ida ne’e, tanba ne’e mak ha’u loke”, konta tuir Ludovino, vensedór primeiru lugar konkursu PHD, kona-ba afirmasaun Zélia dos Santos, husi Bobonaro ne’e.

Jerasaun Cribas, Manatutu, Ludovino ne’e haktuir mós kona-ba nia kronolojia, liliu nia abilitasaun literária katak nia hahú nia estudu primária iha Eskola Primária Cribas, Pré-sekundária iha São Miguel Arcanjo no Sekundária iha SENOFA-Semináriu Nossa Senhora de Fátima (Semináriu Menór Balide), Díli.

Hafoin termina estudu sekundária, nia konkore ba universidade públika UNTL, konkore ba kursu filozofia, ho opsaun komunikasaun, maibé hafoin divulgasaun naran kandidatu, nia konsege liu iha departamentu Komunikasaun Sosiál, iha tinan letivu 2014.

“Ne’e orgullu boot, ne’e dalaruma vokasaun, hodi bele tama iha departamentu ida ne’e,” refere Ludovino dos Santos, murak mean ida husi Ilário da Cruz ho Leopoldina dos Santos, husi rai Manatuto, poténsia agrikultura no hortikultura ne’e.

Kona-ba esperiénsia moris, Ludovino haktuir katak hanesan estudante, kompara ho bainhira hamutuk ho família [inan-aman] la hanesan ho bainhira hela ketak, hela dook hodi eskola tanba ne’e iha difikuldade.

Difikuldade ne’ebé dalaruma sai hanesan preokupasaun mak finanseiru basá la fásil hanesan bainhira ho inan-aman.

“Iha problema barak ne’ebé mak hasoru, liliu iha nesesidade moris lorloron, nu’udar vida estudante universitáriu hanesan dalaruma osan la iha hodi halo traballu ruma ho lalais nomós seluk tan”, dehan estudante komunikasaun ne’e.

Maske nune’e, Ludovino dos Santos fó hanoin nafatin, nu’udar mós mensajen ba estudante seluk katak ita tenke pasiénsia tan pasiénsia mak bele manan buat hotu. Aproveita tempu aprende nafatin, mezmu dalaruma iha difikudade no hetan dezafiu.

“Atu dezafiu saida de’it, tenke hasoru hodi bele hakat ba oin”, Ludovino ne’ebé nia prinsípiu katak hakarak ka lakohi tenke termina duni estudu iha universidade, liliu iha Komunikasaun Sosiál, maizmenus la halo buat di’ak barak maibé bele halo netik buat balun hodi kontribui, liliu ba iha informasaun ne’e, fó mensajen.

Entretantu, Produtu KS ne’ebé hetan “vitória” ka vensedór eh manan na’in hodi hatudu prestasaun akadémika iha eventu nasionál sira, organiza husi entidade sira seluk envolve estudante KS sira ne’ebé departamentu apresia liuhusi atividade amizade (bina-akrab), mak manan na’in kompetisaun filmajen badak, iha PHD-Austrália, 2017 primeiru lugar mak estudante Ludovino dos Santos.

Segundu lugar, estudante Hermenegildo Maia Oliveira no terseiru lugar mak estudante Bernardo Corte Real.

Tuir mai, manan na’in ba kompetisaun kona-ba filmajen badak: lokutór rádiu no filme badak TLMDC (Timor Leste Media Development Center)-Rádiu Rakambia DCS-SEKOMS (Sekretáriu Estadu Komunikasaun Sosiál), 2016, mak estudante Candido Alves, terseiru lugar. Nune’e mós ba estudante Dilijanto F. Viana Xavier, segundu lugar.

Inklui, manan na’in ba kompetisaun fotografia kona-ba: “Human Behind the Camera” TelKomcel, 2017 mak estudante Iriana Domina Soares, terseiru lugar.

Manan na’in ba kompetisaun fotografia (ONU-Organizasaun Nasaun Unida): “Juventude no Objetivu Dezenvolvimentu Sustentável” 2015 mak estudante Eugenio Pereira da Silva.

Manan na’in ba kompetisaun fotografia: “Dili Photographer Comunity” mak estudante Verónica de Oliveira Ximenes.

Prestasaun ne’ebé estudante sira atinji hodi reprezenta departamentu Komunikasaun Sosiál hodi hatudu ba públiku kona-ba kualidade estudante komunikasaun, UNTL (Universidade Nasionál Timor Lorosa’e) nian ne’e nu’udar motivasaun no korajen ba estudante sira seluk no iha futuru.

“Ne’e hanesan motivasaun ba estudante sira seluk iha futuru, atu bele hetan mós rezultadu sira hanesan ne’e”, dehan diretora departamentu KS, Dwikori Sitaresmi hodi enkoraja estudante sira bainhira komemora susesu estudante KS nian, foin lalais ne’e.

Atividade ne’e rasik hetan partisipasaun husi Sekretáriu Estadu Komunikasaun Sosiál, Matias Boavida nomós konvidadu sira seluk.

Jornalista: Rafy Belo

Editora: Rita Almeida

HUSIK IDA HATÁN