Republikanu Manan Promove Kréditu Ho Funan Ki’ik

0
46
Prezidente Partidu Republikanu, João Saldanha halo dialogu ho komunidade Suku Dato, Postu Administrativu Liquisa.

LIKISÁ (TATOLI) Prezidente Partidu Republikanu (P-PR), João Mariano Saldanha, promete bainhira Partidu Republikanu (PR) manan iha eleisaun antisipada, sei promove kréditu ho naran republikanu ba povu ho funan (jurus) ki’ik.

“Kréditu Republikanu atu hadi’a povu nia moris, ba sira ne’ebé mak presiza ho funan ki’ik, nune’e bele ajuda maluk sira ne’ebé hakarak fila liman, selu eskola, hadi’a uma no seluk tan,” João Saldanha, hato’o iha Suku Dato, Postu Administrasaun Likisá, Munisípiu Likisá.

Nia dehan, kréditu republikanu funan porsentu 1 ba membru PR no porsentu 1,5 ba sira ne’ebé la’ós membru partidu ne’e.

“Iha Dili, bainhira lansa kréditu ne’e, iha ema na’in 200 mak tau naran ona atu sai membru hodi bele asesu ba kréditu,” nia informa.

Programa seluk, PR defende mak halo uma ba komunidade ho naran “Uma Moris Di’ak” ho kuartu rua, sala, dapur no hariis fatin.

Mákina Republikanu, nu’udar programa seluk ne’ebé PR hakarak introdús ho hanoin ida komunidade sira bele aumenta rendimentu familiar liuhosi mákina dulas kafé, nune’e komunidade ne’ebé mak hetan bele halo jestaun ba mákina ne’e hodi hetan rendimentu.

Entretantu, iha suku Dato hahú iha tuku 15:30 ne’e hetan partisipasaun husi komunidade kuaze na’in 30. Maski iha loron ne’ebé tuir oráriu Partidu Republikanu (PR) tenke halo diálogu no fahe sticker ba komunidade iha postu administrativu Bazartete, maibé tanba la iha koordenasaun di’ak, diálogu ne’e realiza fali iha suku Dato.

 Jornalista: Julia Chatarina

Editór : Manuel Pinto

HUSIK IDA HATÁN