REFLESAUN: AMIZADE NE’EBÉ LOLOOS SEI FÓ SUSESU RELASAUN MORIS ITA NIAN

0
215
Estudante UNTL, Lizerio Dias “LD”

Husi: Lizerio Dias “LD”, Estudante Universidade Nasionál Timor Lorosa’e [UNTL]

“Reflesaun kona-ba amizade, onestidade, umildade (haraik an) no kumpri lei hodi fó lisaun ba ema seluk iha moris. Belun oinsá maka ita-rua bele hametin nafatin valór onestidade, justisa no umildade iha ita-rua nia amizade mezmu ita hasoru dezafiu ne’ebé todan liu?”

Istória oioin hatudu amizade ne’ebé loloos sei fó susesu no motivasaun iha ema ne’ebé hala’o amizade sira-nia jornada ba susesu nomós harmónia sosiál no dame iha sosiedade, maibé dalawa’in mós hatudu belun balun besik ita bainhira iha tempu di’ak de’it, no tempu difisíl dok husi ita no amizade balun mós halo hodi defende nafatin ita-nia belun mezmu nia halo sala no to’o ikus ita-nia istória amizade sai la di’ak hotu. Reflesaun ida ne’e hakerek atu fó ilustrasaun balun hodi bele hametin nafatin ita-nia amizade iha tempu di’ak no aat nia laran hodi hametin valór loloos amizade nian.

Provérbiu ida dehan nune’e “belun ne’ebé di’ak mak belun ne’ebé sempre fó hanoin ita atu labele monu ba sala, tanba hadomi liu ita-nia susesu nune’e nia nunka hakarak atu husik ita monu ba sala”, afirmasaun iha provérbiu ne’e inspira tebes ha’u ho belun di’ak ida bainhira ami lee, nune’e nia husu mai ha’u katak oinsá ita bele prátika loloos liafuan ne’e? ha’u hatan ba nia se iha futuru ha’u halo sala ruma ne’ebé la kontra lei maibé hakanek ó-nia sentimentu, ó presiza bolu ha’u no fó hanoin mai ha’u bainhira ita-rua mesak, ida ne’e hodi halo tuir mós provérbiu seluk ne’ebé dehan “Korije ó-nia belun bainhira imi rua mesak, no apresia nia susesu iha ema barak nia oin atu bele motiva nafatin nia”.

Hafoin nia husu fali oinsá ba sala balun ne’ebé karik ó halo kontra lei? Ha’u hatan ida ne’e maka dezafiu todan liu ba ita-rua nia amizade, maibé atu hatudu onestidade no konsisténsia loloos husi valór amizade ne’e maka ó tenki halo keixa no lori ha’u ba prosesa iha tribunál i hatama ha’u iha prizaun, nia dehan ida ne’e todan liu, i ha’u hatan sim todan duni maibé ida ne’e de’it mak bele fó lisaun katak objetivu lulik husi ita-nia amizade ne’e maka atu defende lia loos no atu hanorin malu ho asaun konkretu ba prátika lia loos, no-nia husu tan i ó ba tiha prizaun oinsá ita-nia amizade bele kontinua?

Ha’u hatan, ida ne’e simples de’it, bainhira ha’u tama tiha prizaun, nu’udar belun ó lori fali livru sira ne’ebé iha relasaun atu fó hanoin mai ha’u sobre erru ne’ebé ha’u komete, atu ha’u bele lee hodi arepende no livru ne’e nu’udar ó-nia fatin atu hamaluk ha’u iha prizaun, nia dada iis no husu i ha’u fó ona livru ba ó no saida mak ó sei halo fali hodi hamaluk ha’u no fó nafatin esperansa mai ha’u sobre ita-nia amizade? Ha’u hatan, iha prizaun nia laran ne’e fatin hakmatek liu ne’ebé iha ne’eba tempu oportunu mai ha’u atu halo orasaun barak hodi husu grasa ba ó atu susesu nafatin, ba jurista sira atu sira iha saúde di’ak atu tesi nafatin lia loos ba ema hotu no ba ita-nia amizade rasik atu buras nafatin hodi kumprimenta de’it ba ukun fuan lulik kona-ba  prátika lia loos atu sai lisaun boot ba ema seluk.

Se ita-rua halo ida ne’e ita-nia istória sei fó konsiensializasaun boot ba ema seluk kona-ba oinsá atu iha amizade hodi fó hanoin malu kona-ba lia loos liuhusi kumpri lei husi sira-nia hahalok no la’ós sira-nia kolia, no kona-ba konsisténsia iha tempu difisil nia laran hodi tulun malu nafatin tuir kondisaun ne’ebé iha no la’ós liga malu iha tempu di’ak nia laran de’it no ikus ita-rua nia istória amizade ne’ebé simples maibé bele fó lisaun no inspirasaun ba ita-nia Líder sira atu hatuur loloos, separa loloos no prátika loloos amizade, justisa, umildade no onestidade tuir idaidak nia tempu no fatin.

Reflesaun ne’e ha’u hakerek hetan mós inspirasaun husi Bispo Dom Basílio do Nascimento nia homília dala ida iha Laclubar ne’ebé dehan “Ita bele familiár no sai belun ho ema hotu, maibé ita tenki familiár no sai belun liu ho lia loos” no iha ha’u-nia perspektiva ida ne’e bele fó hanoin mai ita atu hametin nafatin ita-nia amizade iha situasaun hotu ho dalan haraik an no onestidade i kumpri nafatin ba lei ho fuan boot atu fó lisaun ba ema seluk tanba ita ema moris imperfeitu. Edukasaun no valóres pozitvu sira ne’ebé ha’u hetan bainhira sei hela ho Padre sira inspira ha’u atu fiar nafatin katak onestidade, justisa no umildade (haraik an) mak sai forsa boot liu atu halo ita sai ema ho valór no integridade iha mundu no nu’udar preparasaun ba ksolok moris rohan laek iha lalehan.

Loron di’ak ba maluk sira hotu!

HUSIK IDA HATÁN