Povu Ermera Husu Obrigado ba Xanana

0
231
Presidenti Partidu Koligasaun AMP(Aliansa Mudansa ba Progressu) rei hela Inan Feton ida nia liman wainhira partisipa iha kampamha partidu Koligasaun AMP nian ba Eleisaun Antisipa(E A) iha Gleno Municipio Ermera Segunda 16 Abril 2018.FOTO TATOLI

GLENO (TATOLI)—Eis-FALINTÍL, Gil da Costa, lori povu Ermera nia naran fó obrigado ba Komandante FALINTÍL, Kay Rala Xanana Gusmão. Nia konsidera Xanana nia esforsu mak hamoris rezisténsia iha Ermera. Nune’e mos, Xanana defende ona fronteira Marítima.

“Ha’u empresta Ermera nia lian no ibun, hodi hatete, no hato’o; Avo Nana (Xanana-red), ami Ermera la iha murak no mutin hodi fó ami husu de’it mak Obrigado,” Gil da Costa hato’o iha kampaíña Aliansa Mudansa ba Progresu (AMP), iha Gleno, ohin.

Nia esplika fó obrigado ba Kay Rala Xanana Gusmão, tanba iha tempu rezisténsia, ho Xanana nia esforsu, lori kilat lolon ida ho marka AR15, entrega ba Eis-gerrilleiru, Ernesto Dudu (aktual, deputadu Partidu Demokrátiku), iha Ermera, ikus mai nia funu iha region IV moris.

“Obrigado, Avo Nana, Ita boot nia mehi lori AR15 ida mai fó ba Apa Dudu hodi hamoris Ermera. Ita boot ba ko’alia kona ba Fronteira Marítima, maski matenek barak mak la fiar maibé ikus mai konsege manan. Obrigado ba Ita Boot,” Gil hato’o tan.

Nia husu ba Ermera oan sira hotu atu vota ba AMP, iha loron 12 Maiu, hodi hatudu sentidu obrigadu ba Kay Rala Xanana Gusmão, ne’ebé oras ne’e sai hanesan Prezidente ba AMP, bainhira AMP manan, Xanana Gusmão ho nia alin Taur Matan Ruak sei hametin estadu.

Iha fatin hanesan, Konselleiru Superior AMP, Naimori Bucar, reforsa, fó fiar (vota) ba Kay Rala Xanana Gusmão ho Taur Matan Ruak atu ukun, iha tinan lima mai, nia objetivu mak hakotu problema hotu-hotu hodi lori povu ba moris di’ak.

“Ha’u atu hatete de’it katak, ohin loron se mak halo sala hodi iha eleisaun antisipada ? Maun balun nia hahalok mak ohin loron sai hanesan,” Naimori dehan tuir.

Nia husu atu lider polítiku sira ba oin la bele dun ba AMP, katak, ho AMP mak hamosu Eleisaun Antisipada. Maibé, tanba iha lider balun trata, tolok partidu KHUNTO, ikus mai nia rezultadu iha Eleisaun Antisipada.

Ho ida ne’e, nia husu ba partidu ne’ebé mak oras ne’e sei adora lider refere, buka hakses an. Partidu hanesan Fretilín ema hotu hadomi, tantu partidu KHUNTO, Partidu Libertasaun Popular ho CNRT, ne’ebé Xanana mak lidera.

(Ekipa Kobertura)

HUSIK IDA HATÁN