Partisipasaun Feto Fó Impaktu Ba Kualidade Dezenvolvimentu

0
84
Prezidente Republika, Francisco Guterres Lu Olo. Foto Antonio Goncalves

DILI, (TATOLI) – Prezidente Repúblika, Francisco Guterres Lú Olo, hatete feto sira-nia partisipasaun fó impaktu boot tebes ba kualidade dezenvolvimentu nian, inklui kualidade demokrasia. Tanba ne’e Konstituisaun Repúblika Demokrátika Timor-Leste hatuur  prisípiu igualdade direitu entre  feto ho mane nian.

“Feto nafatin mak ka’er responsabilidade boot liu ba oan sira-nian edukasaun no saúde, maski tuir loloos aman sira mós presiza envolve aan liután iha oan sira-nia dezenvolvimentu”, katak Prezidente iha nia mensajen ne’ebé hato’o husi Xefe Kaza Sivíl, Francisco de Vas Conselhos, ba aniversáriu da-sanulu Asosiasaun Emprezariál Feto Timor-Leste (AEMTL-sigla iha portugés) ne’ebé selebra iha Otél Novu Turizmu, ohin.

Aleinde ne’e feto timoroan sira-nia serbisu iha to’os-laran importante tebetebes ba ekonomia uma-laran iha fatin sidade no área rurál.

“Liuhusi ekonomia uma-laran, feto sira-nia serbisu fó impaktu maka’as ba ekonomia nasaun. Kuantu maiór feto sira-nia koñesimentu kona-ba jestaun ekonómika tenke boot no oportunidade dezenvolvimentu ekonomia uma-laran mós tenke barak atu nune’e produsaun no dimensaun ekonomia nasaun nian bele sai boot liután”.

Família iha vantajen atu hadi’ak jestaun ba sira-nia rendimentu, inklui família ho rendimentu ki’ik, tantu iha sidade, kioske, iha foho no to’os-laran ne’ebé maioria povu moris, nomós feto timoroan barak hela ba. “Hasa’e koñesimentu feto sira, sei ajuda hadi’ak ekonomia família no país”.

Domíniu ne’ebé AEMTL iha kona-ba jestaun ekonómika no oportunidade emprezariál bele kontribui hodi fó feto sira kapasidade boot atu mellora ekonomia família nian.

Iha loron AEMTL nian ne’ebé halo parseria ho Sekretária Estadu Igualdade Jéneru no Inkluzaun Sosiál hodi eskolla tema Simpóziu ida mak Oportunidade Emprezariál iha Tempu Resesaun Ekonómika hatudu kondisaun ekonomia Timor-Leste iha faze dezenvolvimentu.

“Movimentu ita-nia ekonomia sei depende liu ba despeza públika mak Orsamentu Estadu. Atividade empreza no desizaun investimentu emprezáriu sira depende maka’as ba akizisaun sasán no serviços departamentu Estadu nian”.

Nune’e responsável públiku ka sidadaun, emprezáriu no traballadór sira tenke konxiente ba realidade ekonomia iha país ne’e.

“Ita hakarak diversifika ekonomia nasionál no fó kapasidade barak ba empreza no emprezáriu sira, mas realidade mak investimentu sei depende liu ba Orsamentu Estadu”.

Krize ekonomia balun labele kontrola tanba depende ba situasaun ekonomia internasionál nian no oras ne’e daudaun nasaun hasoru hela resesaun ekonómika iha rai-laran tanba krize polítika ne’ebé mak akontese durante fulan balun no hamosu situasaun karénsia ba empreza sira, serbisu-na’in no sira-nia família maski país iha osan atu halo ekonomia la’o ho di’ak.

Pur tantu dezafiu ne’ebé país enfrenta, timoroan inklui feto no mane hadutu ho klareza katak hadomi pás no armonia.

Liuhusi selebrasaun loron asosiasaun nian ho tópiku ne’ebé hili iha simpóziu ne’e importante tebes no Prezidente fiar katak dezafiu agora ne’e bele kontribui hodi hasa’e kooperasaun entre setór privadu no Estadu ba agora no futuru, iha projetu ba intresese públiku ne’ebé mak fó vantajen mútua.

Hatutan feto timoroan sira-nia partisipasaun ativu iha kompañia, iha ekonomia no nivel sosiedade hotu hatudu sinál importante hanesan sidadaun feto no mane sira-nia hakarak atu fahe lesuk responsabilidade iha prosesu dezenvolvimentu hodi harii nasaun ida di’ak iha futuru.

Jornalista: Maria Auxiliadora

Editora: Rita Almeida

HUSIK IDA HATÁN