DILI (TATOLI)—Ministru Defeza no Seguransa, José Agostinho Sequeira Somotxo lori lista ofisiais FALINTIL-Forsa Defeza Timor-Leste (F-FDTL) hamutuk ema na’in haat (4) hatudu ba Prezidente Repúblika, Francisco Guterres Lú Olo, ne’ebé sei promove ba brigadeiru jenerál.
Somotxo hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, sesta ne’e, hafoin soru-mutu ho Xefe Estadu Lú Olo.
Nia esplika katak promosaun ba ofisiais na’in haat ne’e ho objetivu atu responde ba nesesidade seguransa fronteira marítima entre Timor-Leste no Austrália ne’ebé maka sai hanesan preokupasaun boot ida ba Estadu Timor.
“Ha’u mai lori proposta promosaun ofisiais iha F-FDTL para iha tempu badak nia laran atu promove ba brigadeiru jenerál, nune’e bele responde ba seguransa fronteira marítima ne’ebé Timor-Leste iha,” Somotxo informa.
Governante ne’e hatutan promosaun refere mós hanesan ezijénsia hosi Planu Estratéjiku Dezenvolvimentu Forsas Armadas. Kona-ba identidade hosi ofisiais na’in haat, nia hatán, nia laiha kompeténsia atu fó sai naran, só Prezidente Repúblika.
(Jornalista: Xisto Freitas)
(Editór : Manuel Pinto)
