Le Naan Urat Ho Lian Nain Likisá Iha Paktu Unidade Nasionál

0
136
FOTO:ergilioferreira610.blogspot.com

DILI (TATOLI)-Alberto Rodrigues, nu’udar reprezentante lian na’in hosi munisípiu Likisá siik, naan urat hosi fahi no bibi ne’ebé oho iha serimónia ritual, Paktu Unidade Nasionál, iha sinál negativu. Naan urat hatudu, fahe ba rua.

“Ami oho animál rua. Ida fahi, no ida seluk bibi, maibé nia urat hamosu konsekuénsia barak. Ami le nia urat hatudu fahe ba rua, signifika partidu polítiku sira sei hatún malu iha kampaña eleitorál,” Alberto Rodrigues haktuir iha serimónia rituál no paktu unidade nasionál iha Komisaun Nasionál Eleisaun (CNE-Sigla Portugés), Salaun Lalini Larigutu, Sábadu (7/04).

Nu’udar ema ne’ebé fiar ba “Lulik” Alberto sente preokupa. Tanba ne’e liuhosi mídia nia hakarak klarifika ba públiku hosi sinál ne’ebé nu’udar lia na’in nota ona.

Tuir nia, bainhira naan urat fahe ba rua, signifika iha kampaíña “polítiku” sira nia nanál fahe ba rua. Tanba ne’e, haree hosi aspetu fiar animismu “Lisan” Polítiku sira sei hatún malu.

“Maski nune’e, militante hosi partidu polítiku nian sei la iha problema,” Alberto garante.

Hodi hatutan, sei la akontese mate, soke malu, entre militante no simpatizante partidu polítiku nian, iha kampaíña.

Haree ba sinál be nakonu no moos, iha ritual paktu unidade nasionál, tuir Lisan Timor-Lorosa’e, iha matak malirin, ba partidu polítiku no koligasaun partidária.

“Haree hosi naan urat hosi animál mostra katak bé nakonu ho moos.”

Enkuantu lista Partidu polítiku no koligasaun partidária ne’ebé sei kompete iha prosesu kampaíña iha eleisaun antisipada mak hanesan, koligasaun Aliansa Mudansa ba Progresu (AMP), Movimentu Dezenvolvimentu Nasionál (MDN), Movimentu Sosiál Demokrata (MSD), Frente Dezenvolvimentu Demokrátiku (FDD), Partidu Esperansa Pátria (PEP), Partidu Republikanu, Partidu Frente Revolusionáriu Timor-Leste Independente (Fretilín) no Partidu Demokrátiku (PD).

Esperansa

Relasiona ho sinál rituál ne’ebé hatudu sinál, espera ho asina paktu nasionál husu atu polítiku sira fó neon ho laran atu kumpre konstituisaun, lei no regulamentu eleitorál sira.

Ka’er no respeita prinsípiu universál kampaña eleitorál hodi garante liberdade propaganda, igualdade ba oportunidade no transparénsia.

Aleinde ida ne’e promove direitu umanu sira, igualdade jéneru no partisipasaun inkluzivu nu’udar fundasaun hodi haburas demokrasia.

Hakribi violénsia hodi promove kultura no diálogu nu’udar meiu ida hodi hametin pás no unidade nasionál.

Simu rezultadu eleisaun antisipada laran tomak no fó apoiu ba partidu polítiku ka koligasaun partidária ne’ebé sei kaer ukun.

Entretantu, antes ne’e xefe estadu, Francisco Guterres “Lu-Olo alerta ba partidu polítiku no koligasaun partidária katak kampaña eleitorál tenke ba fa’an programa la’ós atu ba ataka malu.

Jornalista : Zezito Silva.

Editór : Manuel Pinto

HUSIK IDA HATÁN