Kandidatu Traballadór 619 Tuir Teste Fíziku

0
131
Kandidatu traballadór Korea hamutuk 619 tuir teste fíziku iha Akademia Polísia Komoro.

DILI, (TATOLI) – Kandidatu traballadór Korea hamutuk 619, ohin halo teste fíziku iha Sentru Formasaun Polísia Nasionál Timor-Leste (PNTL), Komoro.

Ezame ne’e hetan apoia husi instrutór PNTL hamutuk na’in-20. “Ezame fíziku ba push-up ne’e iha 15 de’it, lahanesan ho ezame polísia nian ne’ebé todan liu. Halai mós ami redús ba dala-ualu iha kampu”, hatete Komandante Sentru Formasaun PNTL, Arquinino Ramos, iha akademia polísia Komoro, ohin.

Sobre ezame luku tasi ba traballadór ne’ebé liu iha área peska, Sekretáriu Estadu Juventude no Traballu (SEJT) sei informa fali ba Komandante Jerál no husi Polísia Marítima mak bele apoia ida ne’e. “Ami responsabiliza ba ezame fíziku ne’ebé mak tuir pedidu husi Sekretáriu Estadu”, katak Arquinino.

SEJT, Nívio Leite Magalhães, hatete razaun ezame ne’e tanba traballadór ne’ebé haruka bá Korea iha balun fíziku ladún di’ak no bainhira hasoru serbisu todan, posibilidade bele abandona.

“Bainhira sira abandona serbisu maka sei konsidera ilegál no agora daudaun iha Korea ita iha númeru boot, tanba ne’e hanesan membru Governu ne’ebé responsabiliza ba área ida ne’e tenke buka mós solusaun. Ita labele labele buka problema, maibé lafó solusaun”.

Nune’e solusaun ida mak sira ne’ebé atu hala’o serbisu iha Korea tenke tuir teste ba sira-nia fíziku ne’ebé iha tempu badak sei dezloka bá Korea.

“Presiza halo teste fíziku tanba sira sei bá halo serbisu iha área peska. Serbisu ida ne’ebé lakmaan, tanba ne’e tenke preparadu no prontu atu hala’o knaar ne’e no bainhira bá ne’ebá mak sira serbisu hodi di’ak maka tratamentu ba sira mós sei di’ak. Ida ne’e mak ita hakarak atu asegura katak hetan tratamentu ne’ebé di’ak no dignu”.

Tuir informasaun traballadór balun ne’ebé fíziku ladún di’ak dalaruma sira-nia empregadór fó tratamentu ladi’ak hanesan hirus no baku.

Antes ne’e iha kandidatu hamutuk 7255 ne’ebé tuir ona teste eskrita hafoin bele tuir kursu lia-korea.

“Selesaun ne’e tuir sira-nia kapasidade, só ida ne’ebé iha kualidade mak bá, sei laharee ba grupu, família ka partidu. Programa ne’e tenke loke ba timoroan hotu no labele iha diskriminasaun, tanba ne’e mak ami halo no prosesu teste ne’e sei kontinua fíziku depois organiza sira para bele bá mós iha tasi tanba sira sei serbisu iha área peska tenke iha esperiénsia ida hanesan ne’e”, hatutan tan.

Governante ne’e dehan tan: “Ha’u mós ko’alia ho sira balun ne’ebé serbisu iha área peska mas nunka nani tasi, ida ne’e iha posibilidade boot atu abandona serbisu tanba hakfodak ho situasaun reál ne’ebé hasoru”.

Ba númeru traballadór ne’ebé iha bele prienxe kuota ne’ebé Korea fó, maibé sira ne’ebé lapasa labele ba tanba programa ne’e laharee ba kuantidade, maibé kualidade ema nian.

Jornalista: Maria Auxiliadora

Editora: Rita Almeida

HUSIK IDA HATÁN