Iha Fulan Neen Konsege Dada FDI Liu Millaun 40

0
305
Ministru Turizmu (MT), Manuel Vong. Foto Tatoli/Egas Cristovao.

DILI, (TATOLI) – Ministru Turizmu, Manuel Vong, hatete iha fulan neen nia laran Ministériu Turizmu (MT) konsege dada foreing direct investment (FDI) ka investimentu diretu liu millaun 40.

“Investimentu hirak ne’e mai husi ita-nia parseiru investidór sira husi nasaun oioin. Laiha intensaun buat ida atu hetan benefísiu ba pesoál, se la’e ita hakarak atu serví povu no rai doben Timor-Leste ho ita-nia kbiit tomak. Hakarak atu serví ho ita-nia integridade”, Vong hatete iha lansamentu Dili Sunset Fair and Visiting Timor-Leste 2030, Unique in Asia iha Kristu Rei, domingu, (8/4).

Tanba ne’e osan hirak ne’ebé depozita ona iha Banku Nasionál Komérsiu Timor-Leste (BNCTL-sigla iha portugés) sei sai hanesan fundu ba dezenvolvimentu turizmu nian.

“Ba ida ne’e, ita-nia modelu dezenvolvimentu importante tebes maka dezenvolvimentu modelu turizmu baze komunitáriu, komunidade tende ser sai na’in ba iha setór turizmu tanba sira mak hela besik no na’in ba iha rekursu turístiku tomak ne’ebé ita iha”.

Tanba ne’e kooperativa turizmu baze komunitáriu husi komunidade sei sai prioridade mezmu halo knaar fulan neen, maibé inisiativa hala’o.

“Seluk mak ita promove juventude empreendedór turístiku tanba sira mak sai futuru ekonomia nasionál Timor-Leste. Ita sira ne’e hahú de’it, sira sei hatutan no lori bá oin nafatin. Iha faze seluk, ko’alia kona-ba empreendedór turístiku nian, nia rezultadu tomak ita tenke fa’an iha merkadu. Merkadu ita-nia importante tebes, ita presiza identifika”.

Austrália, Nova Zelándia, Indonézia, Malázia, Xina, Índia, Japaun, Korea, Filipina, Brunei iha poténsia boot ba merkadu turístiku. Sira hanesan emisór no Timor-Leste hanesan país reseptór nune’e presiza prepara kondisaun.

Jornalista: Maria Auxiliadora

Editora: Rita Almeida

HUSIK IDA HATÁN