DILI, (TATOLI) – Xefe Estadu Maior FALINTIL-FDTL, Major Jenerál Lere Anan Timur, husu ba lideransa hosi partidu Frente Revolusionária Timor-Leste Independente (FRETILIN) no Aliansa Mudansa ba Progresu (AMP) atu hatudu maturidade polítika durante períodu kampaña hodi mantein estabilidade no hakmatek ba povu hodi ezersa diretu ba vota iha eleisaun antesipada to’o formasaun Governu da-ualu.
“Ha’u apela liliu ba partidu bo’ot agora mak Aliansa Mudansa ba Progresu (AMP) ho FRETILIN tenke uza linguajen polítika, labele uza linguajen hafahe ita”, apela Lere iha Kuartel Jerál FDTL Fatuhada, ohin.
Militante partidu rua ne’e, nia dehan tenke sivilizadu hodi promove imajen no dignidade lider nasionál sira hanesan Xanana Gusmão, Taur Matan Ruak, ne’ebé lidera AMP, FRETILIN mak Marí Alkatiri inklui José Ramos Horta.
Respeita malu, katak nia bele fó imajen ba mundu katak maske diferénsa iha polítika, timoroan ida de’it atu hadi’a Nasaun no povu nia moris.
“Aban ita hahú kampaña no loron 12 (maiu) ita ba vota tenke hatudu ba mundu katak Timor mos merese sai Estadu no nasaun”, realsa.
Komandu ba forsa ne’e konfia lider nasionál hirak ne’e sei mantein estabilidade no hakmatek durante kampaña.
Jornalista: Agapito dos Santos
Editora: Rita Almeida
