“Foti Ita Oin Defende Valores”

0
89
Komisária Internasionál ba Uniaun Nasionál Eskuteiru Timor-Leste (UNE-TL), Filomena Barros dos Reis, hamutuk ho nia delegasaun hato’o informasaun ba jornalista sira kona-ba objetivu soru-mutu ho Xefe Estadu Lú Olo. Imajen Ajénsia Tatoli/Xisto Freitas.

DILI, (TATOLI) – Prezidente Repúblika, Francisco Guterres Lú Olo, nu’udar patronu Uniaun Nasionál Eskuteiru Timor-Leste (UNE-TL) atribui moto: “Foti Ita Oin Defende Valores” ba UNE-TL.

Atribuisaun moto ne’e realiza hafoin delegasaun UNE-TL hamutuk ho delegasaun Konsellu Rejionál Eskuteiru Ázia Pasífiku nian hakat ba Palásiu Prezidente Nicolau Lobato, Bairru Pité, tersa ne’e hodi hato’o agradesementu ba Prezidente Repúblika nu’udar patronu.

“Xefe Estadu hato’o katak UNE-TL sai hanesan mahon ba grupu eskuteiru sira hotu iha Timor laran, tanba ne’e tenke defende valores, nune’e transforma joven sira sai sidadaun ida ne’ebé hadomi Nasaun no Maromak. Prezidente Orgullu tebes katak movimentu ne’e la’o duni ho karáter ka identidade Timor nian hodi bele sai ona membru mundiál no membru Ázia Pasífiku”, Komisária Internasionál ba Uniaun Nasionál Eskuteiru Timor-Leste (UNE-TL), Filomena Barros dos Reis, ba jornalista sira hafoin soru-mutu ho Lú Olo.

Nia esplika misaun UNE-TL nian maka hala’o atividade atu forma karáter joven, halo revolusaun karáter liuhusi métodu eskutizmu nian atu bele halo joven sira sai responsável no sidadaun ne’ebé di’ak ba Nasaun no atu serbí Maromak.

“UNE-TL sai hanesan mensajeira ba pás no serbí komunidade. Ami harii ona uma ba ema ne’ebé defisiente matan, halo reflorestasaun meiu ambiente no sira seluk tan”, haktuir.

UNE-TL hamriik iha 2 Dezembru 2005 no oras ne’e UNE-TL iha membru hamutuk ema na’in 11.000.

Jornalista: Xisto Freitas

Editora: Rita Almeida

HUSIK IDA HATÁN