FDD Prioritiza Dezenvolve Ekonomia Povu Husi Knua

0
160
Foto FDD

BAUKAU, (TATOLI) – Frente Dezenvolvimentu Demokrátiku (FDD) prioritiza iha povu nia moris di’ak, nune’e hakarak dezenvolve ekonomia povu nian ho baze agrikultura no turizmu ne’ebé hahú husi knua tanba pobreza barak liu iha fatin ne’e.

Prezidente Konsellu Polítika Nasionál,  Agostinho Gomes, hatete ida ne’e mak objetivu FDD nian oinsá kapasita povu atu haforsa nia ekonomia.

“Tanba objetivu ida ne’e FDD hakarak forma ministériu ida ne’ebé trata de’it dezenvolvimentu husi aldeia mai to’o suku ne’e tanba hakarak povu nia moris di’ak”, Agostinho hatete iha kampana FDD iha Jináziu  Baukau, kuarta ne’e.

Hatutan sei laiha partidu ida manán absoluta, FDD manán sei la absoluta no partidu koligasaun seluk mós hanesan no Governu ne’e sei ba ho Governu koligasaun tanba ne’e FDD sei prepara proposta ida atubele hato’o no proposta mak harii ministériu ida mak atu trata de’it asuntu husi knua bá to’o suku sira.

“Karik ami bá Governu ami sei asenta filafali programa ne’e ho partidu seluk liuliu FRETILIN ho CNRT”.

FDD sei lahalo mega projetu hanesan tasi-mane no ZEESM tanba gasta barak liu maski konkorda ho projetu ne’e , maibé tempu agora  la’ós ba ida ne’e mas daudaun ne’e tenke fó prioridade ba povu nia moris.

“Ba aldeia, área remota FDD nia programa  durante tinan lima to’o sanulu ne’e tenke loke hotu kedan dalan para povu lori nia produtu mai fa’an mós lasusar”.

Iha eleisaun antesipada ne’e FDD garante hetan votu maka’as no tarjetu mínimu hetan kadeira ualu no bele bá 11 tanba iha simpatia maka’as husi povu no FDD konvesidu tebes.

Jornalista: Maria Auxiliadora

Editora: Rita Almeida

HUSIK IDA HATÁN