DILI (TATOLI) – Governu Estadus Unidus ne’ebé sempre apoia eleisaun demokrátika iha Timor-Leste husi kedas tinan 2002, sei kontinua promove prosesu eleitorál tomak ba eleisaun antesipada 2018.
Apoiu husi Misaun EUA nian iha Timor-Leste mai husi Ajénsia Amerikana ba Dezenvolvimentu Internasionál (USAID), Ministériu Negósiu Estranjeiru EUA no ajénsia seluk ne’ebé sei foka liu ba fortalesimentu partidu polítiku sira no instituisaun jestór eleisaun nian, apoia observasaun ba eleisaun no promove atividade edukasaun sívika no edukasaun votante.
“Eleisaun ne’ebé Livre, justu no transparente sei ajuda harii fiar entre Timoroan sira ho sira nia governu.” Embaixadór EUA ba Timor-Leste Kathleen M. Fitzpatrick hateten.
“Ami nia apoia ajuda lori nasaun ne’e ba futuru ida ho auto-sufisiensia, instituisaun demokrátika sira ne’ebé forte no populasaun ne’ebé saudavel no prósperu.”
USAID oferese ona apoia ba International Republican Institute (IRI) atu haruka observadór internasionál na’in 18 iha eleisaun antesipada. Ekipa Observadór Internasionál inklui IRI nia membru konsellu administrasaun, funsionáriu IRI, eis Embaixadór ba Banku Dezenvolvimentu Asia no membru husi Partidu Liberal Australia.
Igreja Katólika nia Observatorio da Igreja Para os Assuntos Sociais (OIPAS) simu mós apoiu husi EUA hodi haruka observadór nasionál ida ba sentru votasaun ida husi sentru votasaun 885 iha Timor-Leste durante loron eleisaun.
USAID mós apoia IRI nia observadór internasionál tolu no OIPAS nia observadór nasionál hodi observa kampaña eleitorál. Hanesan iha eleisaun prezidensiál no parlamentár 2017 nian, Misaun EUA nia funsionáriu sei sai mós observadór iha eleisaun ida ne’e.
Antes eleisaun, partidu polítiku no koligasaun sira simu mós apoiu husi EUA inklui formasaun hodi dezenvolve mensajen kampaña bazeia ba problema real sira no enkoraja feto no joven sira nia partisipasaun.
Hafoin eleisaun, apoiu governu EUA nian sei kontinua atu ajuda haforte Parlamentu Nasionál nia rekursu umanu, kapasitasaun institusionál, promove atividade deputadu sira no oferese apoiu tékniku ba forum Feto Parlamentár.
(Komunikadu)
