Esperanto El Oriente Timoro Tuir Kongresu Internasionál Iha Indonézia

0
240
Partisipante “Trilanda Kongressu” internasionál. Foto: Lidia Imaculada

DILI (TATOLI)-Grupu Estudante Esperanto El Oriente Timoro, ne’ebé aprende lian Esperanto hahú 2013, iha kada semana, iha Kampus sentrál, Universidade Nasionál Timor Lorosa’e [UNTL] tuir “Trilanda Kongressu” internasionál, iha Bekasi, Indonézia, durante semana ida, hahú 28 marsu to’o 02 abril, ohin.

Objetivu husi kongresu ne’e mak atu hakle’an tan lian Esperanto entre nasaun sira iha mundu, tanba lian ne’e sai hanesan lian neutrál (neutral lingvo) hodi akumula lian hotu.

“Iha kongresu ne’e, aprezenta mós dansa kultura Timor nian, kanta múzika Timor nomós aprezentasaun poezia ho títulu violénsia kontra feto,” informa Lídia Imaculada da Conceição, membru grupu ida via facebook, husi Bekasi, Indonézia ba Ajénsia TATOLI, ohin.

Membru Lídia Imaculada haktuir, iha aprezentasaun Timor-Leste nian, husi membru grupu Esperanto El Oriente Timoro na’in 10 ne’e hetan apresiasaun no entuziasmu maka’as husi reprezentante sira husi nasaun oioin.

“Timoroan sira entuziasmu tebes aprende lian Esperanto. Ami gosta tebes dansa Timor nian no hatais kultura timoroan sira nia,” apresia Albert Stalingarino, partisipante ida husi Filipina.

Nune’e mós, Heidi Goes, husi Bélgica dehan ba timoroan na’in sanulu ne’ebé partisipa iha kongresu ne’e katak presiza aprende no aprende nafatin lian ne’e no espera katak iha tinan tolu ka haat mai Timor-Leste mós bele organiza kongresu ne’ebé idéntiku.

Kongresu internasionál ne’e, nasaun sira ne’ebé partisipa mak reprezenta husi, Timor-Leste na’in 10 lidera husi Teofilo José Maria de Jesus, Bélgica na’in ida, España na’in tolu, Filipina na’in ida, Austrália na’in 11, Indonézia na’in 35, Korea Sul na’in ida no Nova Zelandia na’in ida. Kongresu remata ohin, tuku 12h00 oras Indonézia nian.

Akomodasaun no itinerária viajen ba kongresu ne’e, responsabiliza husi Austrália (selu tikete) no Bélgica (selu alojamentu).

Durante estadia, semana ida iha Indonézia, timoroan na’in 10; feto tolu, hela iha Hotel Horison, Bekasi, Indonézia no mane hitu hela iha apartamentu Center Point, fatin hanesan.

Timoroan hirak ne’e sei fila hikas mai Timor-Leste, iha semana ne’e nia laran, no sei kontinua nafatin sira-nia kursu lian Esperanto ne’e, iha Kampus Sentrál, UNTL, iha kada sábadu, tuku 10h00 to’o 12h00.

Jornalista: Rafy Belo

Editór : Manuel Pinto

HUSIK IDA HATÁN