Don Basílio: Ema Hotu Kontribui ba Timor nia Di’ak

0
161
Bispu Dioseze Baucau, Don Basílio do Nascimento, bainhira dadalia ho jornalista sira iha Palásiu Prezidente Nicolau Lobato, ohin dadér. Imajen Ajénsia Tatoli/Xisto Freitas.

DILI (TATOLI)—Bispu Dioseze Baucau, Don Basílio do Nascimento hateten la’ós ema ida ka grupu ida de’it maka kontribui ba Timor nia di’ak, maibé ema hotu-hotu.

“Atu harii uma ida, presiza fatuk ki’ik-oan, fatuk boot, rai henek, simentu no sel-seluk tan,” Líder Igreja Katólika hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, kinta ne’e, relasiona ho líder nasionál sira dún malu kona-ba rezisténsia pasadu.

Tuir Amu Basílio, agora la’ós tempu konta fali buat seluk, maibé programa saida maka partidu polítika sira prepara ona atu hatán ba povu no nasaun nia nesesidade bainhira hetan fiar iha eleisaun atu kaer governu.

Bispu haktuir povu ladún entusiaz ba kampaña eleisaun antesipada tanba ho razaun povu baruk ona ho kampaña tanba líder sira invez ko’alia kona-ba programa maibé ba ke’e malu fali sé maka halo barak liu sé.

“Líder partidu sira bele ko’alia buat oi-oin maibé povu hatene ona partidu ida ne’ebé maka sira atu vota iha eleisaun antesipada, 12 Maiu mai ne’e,” nia dehan.

Bispu tenik, suratahan mutin (bulletin votu) ne’e deside nasaun nia destinu, tanba ne’e, nia apela ba timoroan sira atu ba vota iha eleisaun antesipada.

(Jornalista: Xisto Freitas)

(Editór : Manuel Pinto)

HUSIK IDA HATÁN