CNE Rekomenda Lider ParPol Faan Programa La’ós Hatun Malu

0
63
Prezidente CNE, Alcino Barris. Foto CNE

DILI, (TATOLI) – Prezidente Komisaun Nasionál ba Eleisaun (CNE-sigla portugés), Alcino Barris, rekomenda ba lider Partidu Polítiku (ParPol) sira atu faan programa ba povu la’ós hatun malu no loke ida-idak nia frakeza iha ámbitu kampaña eleitorál.

“CNE nia supervizaun repara momoos ba lider partidu polítiku sira ne’ebé mai hosi jerasaun 1975 ne’ebé ataka malu hodi hadun malu no loke sira nia frakeza ba públiku”, Alcino Barris ba jornalista sira hafoin hasoru malu ho reprezentante lider partidu polítiku sira iha CNE, Kaikoli, ohin.

Tanba ne’e, CNE hakarak rekomenda ba lider partidu polítiku sira hodi faan programa ba povu iha kampaña.

CNE triste ba aktu fase malu, hasai sira nia frakeza ba eleitór sira, hosi sira ne’e mai hosi kamada tolu mak frente armada, diplomátiku no klandestina.

Hodi hatutan kampaña eleitorál ne’e informativu no edukativu, tanba ne’e lideransa labele halo eleitór sira haree malu oin la moos.

“Kampaña ne’e informativu no edukativu, labele halo eleitór sira haree malu oin la moos tanba ita liu ona krize barak no ita lakohi atu akontese tan”, afirma.

CNE sei haruka karta ba lider partidu polítiku sira ba hahalok desrespeitu iha públiku, loke ida-idak nia frakeza. Tanba hakarak ka lakohi ema sempre respeita nafatin sira maibé importante mak labele hatun malu iha públiku.

Lideransa jerasaun 1975 mezmu iha diferénsia polítika maibé sira mak sei marka dezenvolvimentu no kuandu iha estabilidade presiza sira nia kontribuisaun, katak nia.

Biar nune’e, CNE husu ba militante sira partidu polítiku sira no koligasaun partidária katak labele hatun ema nia atributu ne’ebé la iha autorizasaun hosi nia partidu rasik, ne’e konsidera krime.

Sé kuandu akontese mak polísia kaer tenke responsabiliza tanba ida ne’e krime. Ezemplu, akontesimentu balu mosu duni iha munisípiu Baukau, Vikeke no Suai, deskoñesidu balun aproveita oportunidade hodi hasai no hatun atributu partidu polítiku seluk nian, nune’e prosesu investigasaun la’o hela atu bele julga la halo desrespeitu hirak ne’e.

Enkuantu, CNE nia supervizaun ba atividade kampaña ne’ebé la’o durante semana ida la’o hakmatek no susesu tanba sira kumpre órariu kampaña.

Entretantu, kampaña eleitorál hahú ona iha 10 abril no sei taka iha 9 maiu. Nune’e eleisaun antesipada parlamentár se realiza iha 12 maiu.

Jornalista: Zezito Silva

Editora: Rita Almeida

HUSIK IDA HATÁN