Alkatiri Hakarak Lori Polítika FRETILIN Bá Oin

0
239
Sekretáriu Jerál Partidu Frente Revolusionária Timor-Leste Independente (FRETILIN), Marí Alkatiri, Alkatiri iha abertura kampaña iha eis merkadu Manatutu, tersa, (10/4). Foto FB Lian Bankada FRETILIN

MANATUTU, (TATOLI) – Sekretáriu Jerál Partidu Frente Revolusionária Timor-Leste Independente (FRETILIN), Marí Alkatiri, hatete partidu nia polítika ne’ebé atu lori bá oin mak buat ne’ebé povu presiza hanesan bee  moos no saneamentu, uma, saúde, edukasaun, kampu traballu no subsídiu ba ferik no katuas.

Marí Alkatiri hatutan bainhira bá iha fatin hotu-hotu, primeiru laiha bee moos, enkuantu agora hamutuk luta atu lori kadoras mina nia mai Timór, maibé kadoras bee nian seidauk tama bá uma-kain ida-idak.

“La’ós tanba laiha osan, osan barak mak ita gasta ona, kadoras ba suku mós laiha, kadoras iha sidade mós seidauk ba uma-kain hotu, as vezes kadoras bá maibé bee mak labá, ne’e mak FRETILIN atu hadi’a”, katak Alkatiri iha abertura kampaña iha eis merkadu Manatutu, tersa, (10/4).

Hatutan bainhira ko’alia soberania hahú iha kualidade vida  povu nian, hahú husi bee moos, saneamentu, hahú husi uma ida-idak atu ema moris ba ho dignidade.

“Ita ko’alia bee moos, uma, ko’alia mós ba saúde, primeiru Governu halo esforsu tomak haruka povu nia oan bá estuda sai doutór. Agora ita iha doutór rihun ida resin no la’ós elite  nia oan, povu nia oan mak sai doutór. Ne’e primeiru Governu nia serbisu, maibé doutór  sira hasai kursu dalabarak serbisu laiha ba sira hanesan moras iha Timor-Leste ne’e laiha ona”.

Afirma tan Timor-Leste  presiza polítika saúde nian atu hadook povu husi moras, la’ós halo polítika atu kura de’it moras tanba kura moras ne’e di’ak liu ba ema barak, bele halo negósiu ba ai-moruk sira.

“Hadook moras ne’e lahariku ema ida, hadi’a de’it povu nia vida, kura moras ne’e mak hadi’ak ema seluk nia vida hariku ema sira. Ho FRETILIN medida atu foti iha área saúde atu doutór hakbesik aan ba povo atu eduka povu hadook nia aan husi moras, ne’e  mak dehan medisina preventiva”.

Tanba ne’e iha tinan hira ba kotuk, nia dehan halo esforsu atu fó formasaun ba doutór barak. Agora  haree doutór, parteira, enfermeira sira to’o ba suku uma laiha atu hela, halo oinsá sira  bele serbisu. Ida ne’e maka sei sai polítika saúde FRETILIN nian.

“Edukasaun mós hanesan, ita dehan edukasaun ne’e gratis, ne’e mak iha konstituisaun. Dehan katak bá eskola ne’e labele husu osan, povu nia oan iha direitu hanesan ho riku nia oan, iha eskola mós tenke iha kualidade hanesan ou pelu menus besik atu hanesan, tenke iha kondisaun, polítika edukasaun atu hadi’a eskola, halo formasaun ba mestre sira, profisionál edukasaun ita tau iha suku tenke iha uma no kondisaun atu moris, ne’e mak importante tebes”.

Aleinde ne’e joven barak tebes serbisu laiha maski estuda hotu ona tanba laiha polítika dezenvolvimentu atu promove setór privadu no atrai investimentu hodi loke kampu traballu.

“Ne’e mak FRETILIN hakarak halo oinsá bele loke serbisu ba joven sira, investe iha desportu, kultura atu deskobre talentu iha joven sira leet, talentu aban-bainrua reprezenta ita iha mundu, ne’e mak polítika FRETILIN nian atu lori bá oin”.

Aleinde ne’e FRETILIN mós asume kompromisu atu revoga rezolusaun ida bandu tiha arte marsiál atu fó oportunidade ba grupu arte masiál hotu atu moris filafali.

“La’ós de’it kuandu ita presiza sira ita uza sira, dalabarak ita uza sira, sira mak uza fali ita, ne’e mak hatudu momoos”.

Tinan 10 nia laran komisaun omenajen halo fali prosesu veteranu sira sai fali sentru korrupsaun atu hariku aan rasik.

“La’ós atu hariku veteranu sira. Iha fulan neen de’it Sétimu Governu aprova tiha dekretu lei konsellu  nasionál veteranu no promulga ona, lakleur tan atu harii komisaun instaladora atu konvoka kongresu konsellu nasionál veteranu atu moris, atu defende veteranu sira-nia ezijénsia”, afirma tan.

Nune’e mós ba ferik no katuas, nia katak bainhira dezenvolvimentu la’o sei hetan subsídiu ida ho dignidade, dezenvolvimentu la’o signifika osan povu nian  atu haburas ekonomia.

Jornalista: Maria Auxiliadora

Editora: Rita Almeida

HUSIK IDA HATÁN