AEMTL Prontu Kompete

0
61
Prezidente AEMTL, Hergui Lina Fernandes Alves, Espoza Prezidente Repúblika, Cidalia Lopes Nobre Mouzinho Guterres, no SEIJIS, Laura Menezes Lopes, bainhira ko’a hela dosi aniversáriu AEMTL ba da-sanulu. Foto/Facebook Gabinete de Apoio à Actividade do Cônjuge do Presidente da República.

DILI, (TATOLI) – Asosiasaun Emprezariál Feto Timor-Leste (AEMTL-sigla portugés) harii atu promove feto emprezária hodi kompete no susesu iha setór privadu Timor-Leste liuhusi advokasia, promosaun, empoderamentu no disponivel atu dezenvolve no estabelese negósiu ne’ebé sustentavel.

“Ami fiar katak bainhira ita iha resesaun katak ita iha presaun nia laran no obriga kreatividade atu prodús inovasaun no evolusaun”, Prezidente AEMTL, Hergui Lina Fernandes Alves, hatete iha nia diskursu momentu asosiasaun ne’e halo simpóziu ekonómiku internasionál dahuluk iha otél Novu Turizmu, hodi deside tema oportunidade iha resesaun ekonomia, kinta ne’e.

Hergui Lina Fernandes hatutan asosiasaun ne’e ho pilár lima mak haforsa instituisaun, empodera membru no dezenvolve negósiu, asesu ba merkadu no halo ligasaun internasionál, konsolida no kreximentu sustentavel no lóbi no advokasia.

Bazea ba kompromisu ne’e iha aniversáriu AEMTL nia ba da-sanulu ne’ebé monu iha 26 abríl ne’e halo atividade ida ne’ebé edukativu no fundamenta ba vizaun empreendedorizmu atu empodera.

Nune’e mós motiva no muda hanoin autór negósiu sira liuliu nia membru no simultáneamente hakle’an koñesimentu ba ajente ekonómika relevante atu identifika oportunidade ne’ebé mosu ida tempu ekonomia difisil.

Simpóziu ne’e, Hergui Fernandes hatutan atu introdús tendénsia foun ba setór privadu ne’ebé dinámiku atu esplora dalan kerativu no inovadora hala’o negósiu hodi hamenus dependénsia ba projetu públiku, promove alternativa atu kria postu traballu no rendimentu nomós dignifika aan nu’udar setór produtivu loos.

“Ami hein katak hafoin eventu ida ne’e ita bele hetan roman foun hodi hateke ba oportunidade ne’ebé bele transforma sai lukrutivu”.

AEMTL kompromete sei sai autór ekonómiku ida ne’ebé ativu no produtivu iha país ne’e no vontade maka’as atu serbisu voluntariamente atu alkansa misaun.

“Se ita hakarak empodera maluk feto sira tenke husik sira hola parte. Ba prestasaun serbisu ami iha pájina hanesan atu dezenvolve ami-nia aan no negósiu hodi muda hanoin husi dependénsia ba independete no sustentavel hodi kontribui ba ami-nia aan rasik, família no rai doben Timor-Leste”.

Sekretária Estadu ba Igualdade Jéneru no Inkluzaun Sosiál (SEIJIS), Laura Menezes Lopes, katak feto emprezária sei forte iha futuru no presiza haforsa sira-nia ekonomia en termu iha kapasitasaun ba kompeténsia, apoia finanseira no téknika para bele forte ba oin

“Ha’u otimista katak mulheres empresárias sei forte iha futuru”.

 Jornalista: Maria Auxiliadora

Editora: Rita Almeida

HUSIK IDA HATÁN