Kay Rala Xanana Gusmão bainhira simu hosi povu iha aeroportu Nicolau Lobato. Foto Tatoli/António Goncalves

DILI, (TATOLI) – Prezidente Aliansa Mudansa ba Progresu (AMP), Kay Rala Xanana Gusmão, ohin fila hikas mai Timor-Leste hafoin hetan konvite husi Sekretáriu Jerál Nasaun Unida, António Guterres, hodi partisipa diskusaun kona-ba manutensaun no konstribuisaun ba dame iha ONU, Estadu Unidu Amerika.

“Ha’u ba em nome G7+ kontente tanba fó ona lian ba G7+. Troka impresoens, fó hanoin ba Nasaun Unida katak sim buat hotu ita bele hakarak hanesan mundu tomak hakarak pás, maibé ha’u dehan fundamentál tebes tenke komesa mós korije mekanizmu ne’ebé UN uza atu garante pás iha fatin-fatin”, dehan Xanana ba jornalista sira iha aeroportu Nicolao Lobato, Komoro, ohin.

Lider rezisténsia reforsa fatin barak tinan 10 resin, 20 resin ona manutensaun dame hela ne’ebá. “Ida ne’e hanesan workshop boot tebes ida para hothotu tau hanoin oinsá mak UN bele sai efetivu liu”.

Eis-prezidente repúblika haktuir esperiénsia Nasaun G7+ ninian ne’ebé hatudu katak ajénsia UN laduun efetivu maibé gasta osan. “Ha’u hanoin katak buat ne’e hotu bele kontribui halo di’ak liután, iha UN rasik halo analize atu bele haree ba kestaun pás”, hateten lider karismátiku ne’e.

“Sekretáriu Jerál (António Guterres) mós temi hanesan ne’e envez de reaje de’it iha momentu konflitu, UN tenke prepara aan atu buat ruma karik ba kedas buka rezolve”, reforsa.

Xanana rekoñese agora hahú di’ak.  “Di’ak tanba permite G7+ fó hanoin kona-ba esperiénsia ne’ebé sira hetan ho ajénsia ONU iha G7+ nia rain”, espresa.

Enkuantu, husu kona-ba oinsá nia ambisaun pesoalmente iha eleisaun ne’ebé sei realiza 12 maiu, nia hatan la iha ambisaun maibé iha dezeju.

“Pesoalmente ha’u la iha, tanba ha’u envolve iha partidu ida, ami envolve iha koligasaun, iha koligasaun eleitorál ida ne’e la’ós ambisaun, ida ne’e nu’udar deseju atu halo buat ruma”, subliña.

Nune’e mós Xanana deseju hodi halo koresaun. “Primeiramente halo koresaun ba polítika dezenvolvimentu, tanba ita nasaun foun, demokrátiku, tenke tuir regra konstituisaun”.

Lider ne’e dehan tan konstituisaun hateten maoria de’it mak bele garante estabilidade governativa. “Tanba ne’e ami envolve iha koligasaun hodi garante katak hafoin eleisaun ida ne’e bele halo di’ak ruma”, dehan prezidente partidu Kongresu Nasionál Rekonstrusaun Timor (CNRT-sigla portugés).

Husu kona-ba, karik AMP manan eleisaun, nia ba primeiru-ministru, Xanana hatan: “Ha’u fiar katak ida ne’e la’ós problema, ita haree povu haree, hateten iha polítika ida ne’e, ami sei halo ami-nia di’ak hotu”, konklui.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here