DÍLI, (TATOLI)-Rezultadu Estudu kazu AJAR [Asian Justice and Rights] kona-ba justisa tranzitória Timor-Leste konklui katak prosesu justisa tranzisaun iha Timor-Leste [TL] kontinua la’o hatudu rezultadu kontráriu.

Mekanizmu buka lialoos barak husik ona rejistu ne’ebé klaru no kredível kona-ba saida mak akontese iha tempu pasadu, no semak responsável (maske iha akontesimentu fevereiru 2008 kontinua nu’udar exepsaun ne’ebé konkretu).

“Maibé, kontinuasaun no diseminasaun ne’ebé la di’ak halo halo ona limitasaun ba impaktu ne’ebé mekanizmu ne’e halo ona,” refere relatóriu estudu kazu AJAR, Ajénsia TATOLI, asesu, foin lalais ne’e, iha eis-komarka, Balide-Díli.

Estudu ne’e refere mós katak Grupu Traballu CAVR [Komisaun Amizade, Lialoos no Rekonsiliasaun-sigla portugés] nia relatóriu sempre mensionadu atu apoiu aspetu sira ne’ebé mak koñesidu husi deskobrimentu, maibé la uza didi’ak nu’udar rekursu peskiza ka atu eduka kona-ba parte sira menus koñesimentu kona-ba istória Timor-Leste.

Alende ne’e, falta vontade polítika impede ona implementasaun ba rekomendasaun husi mekanizmu hirak ne’e. Razaun ne’ebé sempre mensionadu mak obrigasaun polítika atu manten relasaun pozitivu ho Indonézia. Ida ne’e klaru, iha kna’ar importante. Maibé dinámika internu sira mós iha forsa hanesan.

“Hirak ne’e inklui tendénsia ba veteranu sira atu apodera [sai na’in] ba konflitu pasadu, no aumenta risku ba akuzasaun ne’ebé tenke responsabiliza husi kultura akuntabilidade husi lideransa nasionál Timor nian depois krize 2006,” akresenta relatóriu estudu ne’e.

Maske nune’e, iha estudu ne’e rekoñese, iha ona progresu iha tinan hirak ikus ne’e. Grupu sosiedade sívil prinsipál sira adapta sira-nia aproximasaun ba dezafiu hirak ne’e. Sira aumenta dezenvolve medida saida mak sira bele halo atu la depende ba instituisaun estadu hodi fó apoiu ba vítima, memorializa no eduka.

Sira mós hetan maneira “la konfrontativu” atu serbisu ho governu iha kotuk ba esforsu reforma institusionál ne’ebé konsideradu nu’udar konstrusaun estadu nomós hatan ba ejizénsia justisa tranzitória nian.

Esforsu persistente no falun asuntu sira ho maneira diplomátiku no aproximasaun ne’ebé la hatudu aan husi atór sosiedade sívil sira ba tempu naruk, ikus mai konsege hetan susesu ho estabelesimentu instituisaun indepedente no krédivel ba CNC [Sentru Nasionál Chega-sigla portugés].

Maibé, susesu hirak ne’e kuaze hothotu relasiona ho esforsu sira ne’ebé ho perspetiva ba oin no reparativu. Medida sira ne’ebé mak la klaru mak ne’ebé orientadu ba akuntabilidade. Só akuzasaun limitadu mak akontese, no ne’e maioria foka ba akuzadu sira nível ki’ik no sein prosesu ne’ebé forte atu asegura julgamentu ne’ebé justu.

Figura superiór sira ne’ebé envolve iha violasaun direitu umanu kuaze hotu hasees aan tiha, la’ós de’it husi prosesu julgamentu, maibé mós medida disiplinár sira ka sansaun sira seluk, no mezmu ba kazu sira ne’ebé hetan ona kondenasaun públiku.

“Infelizmente kestaun ne’e la’ós de’it akontese ba membru husi militár no líder polítika Indonézia nian de’it, maibé mós ba elite timorense sira ne’ebé envolve iha krime sira durante funu sívil, iha tempu rezisténsia, ka iha tinan 2006,” deklara relatóriu, estudu kazu ne’e.

Esperiénsia justisa tranzitória iha Timor-Leste hatudu katak oportunidade no dezafiu sira sei muda ho tempu. Entuziasmu iha inísiu ba akuntabilidade no reforma karik sei la dura/tahan ba tempu naruk, no kada esforsu tenke hala’o atu aproveita iha momentu buat ne’e iha.

Hamutuk ho mudansa ba pozisaun, iha nesesidade atu adapta métodu no hanoin ne’ebé utiliza atu falun reforma. Liliu tan, se la iha apoiu estadu ba mekanizmu judisiál ne’ebé klaru identifikadu, karik sosiedade sívil barak bele alkansa ninia objetivu mesak, ka ho foka ba aspetu konstrusaun estadu husi medidas ne’ebé buka.

“Biar nune’e, karik tinan barak molok dalan ba akuntabilidade loos disponível,” hakotu relatóriu estudu kazu AJAR, iha nia konkluzasaun, dezafiu no lisaun aprendizajen, relatóriu ne’e nian.

Relatóriu estudu kazu Timor-Leste, Justisa Tranzitória, AJAR nian kompostu husi pájina 12. Iha relatóriu ne’e hahú husi introdusaun to’o aprezentasaun faktu kronolójiku istória Timor-Leste nian.

Iha introdusaun dekreve kona-ba kontestu istóriku, sosiedade sívil, vítima sira-nia situasaun.

Tuir mai, mekanizmu justisa tranzitória no prosesu to’o agora, iha ne’ebé deskreve kona-ba mekanizmu espesífiku internasionál no estaduál, kompostu husi buka lia loos, prosesu penál, reparasaun no reforma setór seguransa.

Inklui, esforsu ne’ebé la’o hela; inisiativa konstrusaun estadu, sosidade sívil no progresu to’o ohin loron.

Nune’e mós, konkluzaun, dezafiu no lisaun aprendizajen, ne’ebé insere mós kronolojia kona-ba loron istóriku sira, iha kauza Timor-Leste ninian, hahú 25 abril 1974, Revolusaun Kravu iha Portugal halo terminasaun réjime Salaza-Caetano, no estimula inísiu prosesu dekolonizasaun to’o 17 jullu 2017, CNC loke formalmente iha sede CAVR, Komarka Balide.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here