Primeiru-Ministru, Marí Alkatiri. Foto GPM

DILI (TATOLI)—Primeiru Ministru, Marí Alkatiri hateten hafoin eleisaun antisipada nia sei husu relatóriu g7+ ne’ebé Timor-Leste mós hanesan membru ida, tanba to’o ohin loron governu ne’ebé nia lidera seidauk simu relatóriu ruma.

“Sira (g7+) iha sira nia orsamentu rasik, maibé laiha relatóriu kona-ba gasta orsamentu ne’e halo oinsá,” Xefe Governu hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, semana ne’e, relasiona ho progresu saida maka g7+ atinje ona.

Nia haktuir, orsamentu ba g7+ ne’e mai hosi orsamentu jerál Estadu ne’ebé aprova hosi Parlamentu Nasionál no kompremitidu katak nia (Alkatiri-red) sei husu relatóriu ba membru g7+ hosi Timor-Leste iha tempu oin mai hafoin eleisaun antesipada.

G7+ harii hosi nasaun pós-konflitu mak hanesan Afghanistan, Burundi, Republika Sentral Afrikana, Chad, Comoros, Cote divoire, Republika Demokratika Congo, Guine, Gunie-Bissau, Haiti, Liberia, Papua New Guinea, Sao Tome e Principe, Sierra Leone , Solomon Islands, Somalia, Sudan do Súl, Timor-Leste, Togo no Yemen.

Objetivu hosi kriasaun organizasaun ne’e hodi foku ba área importante haat (4): (i) Governasaun (ii) Dezenvolvimentu Ekonómiku (foku ba rekursu naturais, hamenus kiak-mukit, kriasaun oportunidade ba kampu serbisu), (iii) Dezenvolvimentu umanu no sosiál, no ikus liu (iv) área seguransa (foku iha rezolusaun konflitu, rekonsiliasaun, inkluzaun sosiál, diálogu kona-ba harii dame no orden seguransa).

Bazeia ba konferénsia Dili, tinan 2014,  sorumutu Ministeriál g7+ nian hahú hala’o ona kada tinan no tuir rotasaun ba nasaun sira ne’ebé maka prontu hakarak sai uma na’in.

Hahú hosi Juba, Sudaun du Súl, sai uma na’in dahuluk ba Sorumutu Ministeriál Grupu g7+ nian iha Outubru 2011; tuir fali Port Au Prince, Haiti iha Novembru 2012; no Lome, Togo iha tinan 2014. Reuniaun ikus iha Togo ne’e, hamosu Deklarasaun Lome, ne’ebé ho unanimidade adopta Karta g7+ (g7+ Charter), Primeiru Ministru Timor-Leste altura ne’ebá, Kay-Rala Xanana Gusmão, nomeiadu nu’udar Eminent Person & Consultative Council Member ba Grupu g7+ no  iha biban hanesan  Eis Ministra Finansas, Emília Pires (Eis-Prezidente ba Grupu g7+) mós hetan fiar nu’udar Enviada Espesiál (Special Envoy) ba Grupu g7+ nian.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here