Enkontru entre Bispu Dioseze Baucau, Bispu Dioseze Dili no Prezidente Repúblika iha Palásiu Prezidente Nicolau Lobato, Bairru Pité, Dili, ohin dadér. Imajen Mídia Palásiu PR.

DILI (TATOLI)—Prezidente Repúblika, Francisco Guterres Lú Olo, hala’o enkontru ho Bispu Dioseze Baucau, Don Basílio do Nascimento no Bispu Dioseze Dili, Don Virgílio do Carmo da Silva hodi ko’alia kona-ba situasaun polítika iha rai laran.

“Prezidente Repúblika hakarak atu rona opiniaun ruma hosi bispu sira kona-ba situasaun polítika rai laran oinsá ita hotu hamutuk garante nafatin páz no estabilidade,” Xefe Estadu Lú Olo hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, kinta ne’e, hafoin enkontru ho Bispu Don Basílio no Don Virgílio.

Nia haktuir, mosu duni tensaun polítika durante kampaña liu-liu linguazen ofensiva, maibé laiha insidente ruma ne’ebé akontese entre militante partidu. “Ha’u akompaña situasaun ida ne’e maibé buat hotu kalma,” nia dehan.

Lú Olo hatutan, maske militante balun halo provokasaun, maibé la fó influensia ba povu tomak tanba povu hakarak hakmatek no nia kontinua husu ba líder partidu polítiku sira atu hapara linguazen ofensiva, maibé konsentra de’it ba programa oinsá atu hadi’a povu nia moris.

Iha biban ne’e, Bispu Dioseze Baucau, Don Basílio do Nascimento hateten Prezidente Repúblika halo buat ne’ebé Prezidente Repúblika sira seluk uluk halo hodi husu opiniaun ba ema hotu inklui líder Igreja Katólika molok foti desizaun ba situasaun importante relasiona ba nasaun nia vida.

“Kompara ho tempu sira uluk ne’e, ha’u fó ezemplu de’it ba parte lorosa’e, kuandu tempu kampaña hanesan ne’e, rame teb-tebes. Maibé, ikus ne’e, kampaña morna no muron oituan. Tanba ne’e, ha’u ladún rona buat tarutu sira no ema hakilar tún sa’e,” nia haktuir.

Don Basílio informa katak durante kampaña ne’e linguazen maka maka’as oituan maibé violénsia linguístika ne’e laiha problema.

(Jornalista: Xisto Freitas)

(Editór : Manuel Pinto)

HAKEREK NO HATÁN

Please enter your comment!
Please enter your name here