Foto FB STAE

DILI, (TATOLI) – Komisaun Nasionál ba Eleisaun (CNE-sigla portugés) no Servisu Téknika Administrasaun Eleitorál (STAE), kinta ne’e estabelese sentru informasaun iha área praia dos Coqueiros hodi fasilita observadór nasionál no internasionál kona-ba prosesu eleisaun antesipada.

Sentru Informasaun ne’e hetan apoiu hosi Programa Dezenvolvimentu hosi Nasoen Unidas (UNDP-sigla inglés) ba fatin, enkuantu Governu Japaun no Korea toma konta ba imprisaun informasaun.

Diretór Jerál STAE, Acilino Manuel Branco, hateten sentru ne’e fornese informasaun kona-ba sentru votasaun, númeru eleitór, partidu polítiku, atividade páktu unidade nasionál no seluktán.

ʺInformasaun sira ne’e importante liliu ba observadór internasionál no nasionál, tanba ho papél importante atu observa prosesu tomak iha eleisaun antesipadaʺ, dehan Acilino Branco hafoin lansa sentru informasaun.

Entretantu, Vise Prezidente  CNE, Duarte Tilman Soares, hateten estabelesmentu ne’e  sei garante transparénsia hosi rezultadu eleisaun antesipda.

ʺIta hamutuk realiza eleisaun antesipada hanesan istória foun hodi garante demokrasia ne’ebé la’os hakerek de’it, maibé aplika iha prátikaʺ, dehan.

Atu garante transparénsia maka CNE husu apoiu observadór sira atu observa ho rigorozu hodi garante kualidade eleisaun iha 12 maiu.

STAE no CNE agradese ba parseiru UNDP, Japaun no Korea.

Jornalista: Agapito dos Santos

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here