DILI, (TATOLI) – Prezidente Komisaun Nasionál ba Eleisaun (CNE-sigla portugés), Alcino Barris, klarifika ba partidu polítiku sira no koligasaun partidâria katak orgaun eleitorál hala’o nia servisu ho profesionál no imparsiál.
“CNE la inklina ba partidu A ka B maibé servisu ho imparsiál”, afirma Acilino Barris liuhosi konferénsia imprensa iha CNE, kinta ne’e.
Barris hatutan CNE hakarak klarifika preokupasaun balun hosi Aliansa Mudansa ba Progresu (AMP) husu imparsialidade ba orgaun eleitorál nian ba intervensaun hirak ne’ebé CNE halo durante kampaña eleitorál.
Prezidente CNE ne’e dehan ninia parte halo servisu ho di’ak kuandu halo intervensaun ruma iha kampaña eleitorál, hanesan partidu polítiku ka koligasaun partidária sira ne’ebé kampaña liu oras, ida ne’e tenke intervene, la’os CNE haree fali partidu ida di’ak no ida la di’ak.
“Kazu ida iha Suai, AMP halo kampaña maibé liu ona oras, entaun CNE liuhosi delegadu sira halo intervensaun, ami la defende partidu ida dúke partidu seluk”, haktuir.
Nune’e, CNE simu ona reklamasaun ka kontestasaun hosi partidu AMP dehan CNE haree liu ba partidu seluk hanesan publikasaun iha pájina CNE maibé CNE hakarak klarifika katak ne’e la’e tanba pájina CNE sei publika informasaun hotu hafoin kampaña.
“Maibé pajina CNE sei halo publikasaun kompletu, tanba ne’e la iha diskriminassun hosi partidu hotu” afirma. Nune’e mós reklamasaun ida hosi AMP katak Individu balun uza ID falsu lori defama lider partidu sira AMP nian no dadaun ne’e, CNE dirije ona ba polísia atu halo investigasaun.
Enkuantu, bandeira AMP nian ne’ebé hatun iha Bobonaro, Alcino Barris hatan katak bandeira ne’e hasae duni iha sentru votasaun ho nune’e komunidade ne’eba hatun hodi ba hasae fatin dook hosi sentru votasaun.
CNE aviza ba partidu politika sira katak labele uza konvoiu bainhira kampaña eleitorál. Nune’e mós CNE preokupa partidu balun uza dolar tolu iha Oekusi no oras ne’e iha ona prosesu investigasaun.
Jornalista: Zezito Silva
Editora: Rita Almeida
