Prezidente Repúblika, Francisco Guterres Lú Olo, fó omenajen ba memória mártir australianu no neozelandés ne’ebé mate durante Funu Mundiál Daruak iha Jardin Kristu Rei, Fatucama, Dili, ohin dadér. Imajen Mídia Palásiu PR.

DILI (TATOLI)—Prezidente Repúblika, Francisco Guterres Lú Olo, hateten loron Australian and New Zealand Army Corps (ANZAC) la’ós selebra funu, maibé selebra sakrifísiu hosi mane no feto rihun ba rihun ne’ebé tane ás valór sira-ne’ebé sira rasik banati tuir.

“Ha’u sente onra boot mai ohin iha ne’e, hamutuk ho veteranus barak hosi Timor-Leste, Austrália no Nova Zelándia, tanba ohin ita selebra mós relasaun metin no kle’ur entre ita-nia rain sira,” Xefe Estadu hato’o lia hirak ne’e liuhusi ninia deskursu ba selebrasaun loron ANZAC ne’ebé hala’o iha Jardin Kristu Rei, Fatucama, Dili, Kuarta dader ohin.

Lú Olo dehan nia sei serbisu hamutuk ho veteranu sira hosi Austrália no Nova Zelandia hodi hakle’an amizade no sei pratika nafatin valór sira-ne’ebé halibur ema hotu.

Prezidente Repúblika mós hato’o nia ksolok ba família australianu no neozelandés sira-ne’ebé halerik hela tanba lakon sira-nia maluk doben iha funu sira ne’e.

“Ha’u mai iha ne’e hodi hato’o ami timoroan ninia solidariedade no ami-nia omenájen ba feto no mane hotu-hotu ne’ebé sakrifika-án to’o mate hodi tane valores. Importante tebe-tebes hato’o prova sakrifísiu no espíritu serbisu ho valores ba jerasaun foun sira, atu nune’e ita bele harii órden internasionál ida ne’ebé hakmatek no estável liu-tan, iha mundu ida ne’ebé buras liu-tan ba ita hotu-hotu,” nia haklaken.

Loron ANZAC ne’e, Lú Olo informa, nia hanoin-hikas timoroan no australianu sira-ne’ebé luta hamutuk durante Funu Mundiál Daruak iha rain lulik ida-ne’e (Timor-Leste).

“Timoroan rihun neen-nulu mak mate iha Funu Boot ne’e hodi defende dignidade ema nian hosi invazaun Forsa Imperiál Japaun nian iha Fevereiru 1942, iha ne’ebé militár australianu sira hetan kedas apoiu hosi ami-nia povu. Apoiu ne’e mak determina ema nia moris no mate. Apoiu ne’e mak halo veteranu australianu sira sente “dívida-de-onra” ba povu Timor-Leste,” Lú Olo tenik.

Prezidente Repúblika hakru’uk ba memória australianu no neozelandés rihun ba rihun ne’ebé mate durante Funu Mundiál Daruak nomós ba sakrifísiu hosi Timoroan hotu-hotu ne’ebé mate durante luta tinan barak, iha rain lulik ida ne’e, to’o timoroan sira hetan liberdade.

Jornalista: Xisto Freitas

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here