Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur. Foto Tatoli/Xisto Freitas

DILI, (TATOLI) – Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, husu ba lider partidu polítiku (Parpol) sira atu respeita saudozu sira ne’ebé mate iha kampu batalla durante funu hasoru okupasaun Indonezia.
“Dalaruma balun funu fulan tolu ka fulan haat mate, balun tinan lima, tinan sanulu no balun tinan 20 resin mak mate. La’ós sira maka hakarak mate maibé konsekuénsia hosi inimigu nia forsa maka boot liu”, Lere ba jornalista sira iha Palásiu Prezidente Nicolau Lobato, Bairru Pité, kuarta ne’e, relasiona ho lider Parpol balun ne’ebé kestiona fali saudozu balun halo funu tinan badak de’it.

Lere hatutan bainhira hakarak halo funu, tenke iha mate, funu ida eziste laiha mate ne’e laiha lójika.

“Ita ukun án ona ne’e di’ak liu ko’alia kona-ba progresu dezenvolvimentu no povu nia moris di’ak. Se ita ko’alia kona-ba veteranu, Governu ne’ebé de’it mai tenke tau matan ba veteranu sira. Veteranu ne’e la’ós buat foun no la’ós partidu ida ka bloku ida nia responsabilidade de’it”, katak tan.

Ulun boot forsa ne’e afirma saudozu sira ne’ebé mate ona maka eroi loloos tanba sira kumpri ona misaun, fó án ba mate atu liberta pátria.

Iha biban ne’e, eis Komandante Gerileiru mós tenik lider rezisténsia hotu barak ka uitoan fó sira nia kontribuisaun ba autodeterminasaun, la’ós lider ida ka rua de’it maka halo.

“Ha’u veteranu ne’ebé funu durante tinan 24 ne’e ha’u la tabele ba ema ida. Veteranu ne’e ha’u nian. Ha’u ho ha’u nia determinasaun no ha’u nia desizaun rasik maka funu to’o tinan 24”, haktuir.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here