Logo AMP. Foto espesiál

DILI, (TATOLI) – Vise Koordenadór Juridisaun Aliansa Mudansa ba Progresu (AMP), Tiago Sarmento, konsidera membru governu balun utiliza kargu públiku nu’udar instrumentu propaganda eleitorál, ne’e abuzu poder no konflitu interese.

“Dekretu governu númeru 5/2017 kona-ba regulamentu kampaña no propaganda, ida ne’e iha artigu 6 alinea dahuluk ko’alia klaru katak labele utiliza kargu públiku hanesan instrumentu ba propanda eleitorál, maibé realidade membru governu balun kontra fali ida ne’e”, haktuir Tiago Sarmento liuhosi konferénsia imprensa iha sede sentrál AMP, Bairru Grilos, ohin.

Tuir Tiago nia haree hahalok ne’e mosu tanba membru governu halo autorizasaun ba nia án hodi halo dezlokasaun durante kampaña, ne’e konsidera konflitu interese no abuzu poder hodi uza kargu polítika hodi tuir kampaña eleitorál.

Informasaun ne’e AMP rekolla hatudu katak membru governu balun uza kargu públiku ba kampaña partidu nian.

AMP husu ba Provedoria Direitus Umanus no Justisa (PDHJ), Ministériu Públiku (MP), Komisaun Nasionál ba Eleisaun (CNE-sigla portugés) no polísia investigasaun atu haree ba asuntu ne’e, tanba aktu ne’e violasaun ne’ebé grave hanesan uza kargu públiku nu’udar instrumentu propaganda eleitorál.

Iha parte seluk, Membru Juridisaun AMP, Carmelita Moniz, akresenta hahú hosi Primeiru-Ministru to’o membru governu iha direitu tomak atu tuir kampaña ka hala’o kampaña maibé tenke suspende kargu hafoin bele tuir kampaña, nune’e labele uza fasilidade Estadu hodi tuir atividade partidária.

“Membru governu ida hasai rasik autorizasaun ba nia án, ita haree la tama regra no konsidera kómiku tanba hasai ordem ba án rasik”, katak.

Entretantu, Koordenadór Juridisaun AMP, Arão Noe, afirma aktu ne’e orgaun kompetente sira tenke tau matan.

Alende ne’e, Vise Koordenadór Juridisaun AMP mós konsidera adversáriu polítiku sira sempre halo asaltu.

“Iha mós violasaun ba prinsípiu hirak ne’ebé hatur iha regra kampaña nian katak ema seluk tenke respeita ema seluk nia kampaña, realidade AMP sempre sai vítima”, akresenta Tiago Sarmento.

Advogadu ne’e haktuir kuadru polítika AMP hosi Vikeke-Uatulari hetan asalta to’o hetan tuda ho fatuk ba veíkulu partidu nian, iha Oekusi bainhira simpatizante remata tuir diálogu, kuandu fila hetan tuda.

AMP nia apoiante sira hetan tuda bebeik, iha Vikeke-Luka, koordenadór AMP nian uma hetan tuda no estraga, Vikeke-Aliembata, Ermera no Oekusi, hatun bandeira AMP.

Nune’e mós iha kazu seluk, AMP nota katak iha Rejiaun Oekusi mosu aktu balun ne’ebé viola prinsípiu kampaña no mós lider balun rekolle kartaun eleitorál, fahe foos ba xefe suku sira.

Tiago hatutan iha munisípiu Bobonaro akontese hamoos estrada hodi selu dolar tolu, lista ema nia uma atu halo uma foun. Tanba ne’e ninia parte husu ba parte kompetente atu toma medida.

Kazu seluk tan ne’ebé PDHJ fó sai katak atu halo investigasaun kona-ba aktu rituál ne’ebé halo iha munisípiu Ainaro, maibé AMP hakarak klarifika serimónia ne’e akontese molok kampaña.

Nia haktuir lei foun kona-ba arte marsiál no arma branka ne’ebé foin aprova, númeru 5/2017 revoga tiha lei anteriór ba lei arte marsiál, nune’e rezolusaun ne’ebé hasai iha 2013 mós revoga hotu ona, signifika lei anteriór 2008 kona-ba arte marsiál la vigora ona.

Enkuantu, Membru Juridisaun AMP, Carmelita Moniza, reforsa intensaun ba sukat uma atu halo komunidade nia uma no dada eletrisidade ho intensaun polítika atu fó influénsia ba povu molok ba eleisaun.

Entretantu, membru seluk hosi juridisaun AMP, Arão Noe, mós akresenta hamoos estrada dolar tolu no fahe foos ba komunidade ne’e AMP konsidera sosa votu. Nune’e orgaun kompetente sira hola medida tuir regra eleitorál.

Jornalista: Zezito da Silva

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here