iklan

NASIONÁL

AEMTL Sei Realiza Symposium Ekonomia

AEMTL Sei Realiza Symposium Ekonomia

Prezidente AEMTL, Hergui Luina Fernandes Alves halo konferensia Imprensa konaba symposium ekonomia ne'ebe sei realiza iha loron 26 abril. Imajen/Media SEIGIS

DILI (TATOLI) – Asosiasaun Emprezariál Mulheres Timor-Leste (AEMTL) parseria ho Sekretáriu Estadu Igualdade Jéneru no Inkluzaun Sosiál (SEIJIS) sei realiza eventu symposium ekonomia ho tema “Oportunidade iha resesaun ekonómika” iha loron 26 Abríl (aban-red), hodi selebra aniversáriu AEMTL ba dala-10.

Prezidente AEMTL, Hergui Luina Fernandes Alves informa atividade ne’e kompostu husi atividade rua ne’ebé hahú ho symposium ekonomia hafoin hatutan fali ho coctail hodi selebra tinan organizasaun ne’e no iha mós lansamentu ba planu estratéjiku AEMTL nian ne’ebé sei hala’o ba tinan lima ninian.

“Tinan ida ne’e AEMTL halo aniversáriu 10, barak mak sidauk hatene saida mak AEMTL tanba ne’e mak ami sente ho dékada ida ne’e, importante ba ami bele halo atividade ne’ebé mak bele introdús organizasaun nó mós atu bele hala’o atividade ne’ebé mak edukativu liuhosi symposium ekonomia”, nia esplika iha konferénsia imprensa, iha Kaikoli, Tersa ne’e.

Tuir Hergui Luina, liuhosi symposium ida ne’e ita sei ba hare oportunidade iha resesaun ekonomia liuhosi esperiénsia no matenek ne’ebé sei fahe husi oradór sira husi nasaun seluk inklui Timor-Leste.

“Hein katak iha loron ida ne’e ita sei aprende kle’an liu tan atu bele identifika oportunidade iha resesaun ekonomia atu bele transforma no bele halo asaun ida ne’ebé produtivu liu, hodi ajuda setór privadu iha laran no parte hotu”, Luina reforsa.

Nia kontinua dehan, eventu ida ne’e importante tebes no sai mós nu’udar misaun AEMTL nian, katak ho eventu ida ne’e ita bele transforma parte setór privadu nian atu labele depende ba projetu governu nune’e sai setór privadu ne’ebé ho vizaun empreendedorizmu no sustentável.

Entretantu atividade ne’e suporta husi parseria sira hanesan SEIJIS Institutu Apóiu Dezenvolvimentu Emprezariál (IADE), International Finance Corporation (IFC), AICEP Portugal Global no UN-WOMAN.

Oradór sira ne’ebé sei fahe esperiénsia iha eventu ida ne’e mak Vanntha Ngorn (Emprezária ida husi Kambodia), Yusuf Sofian (ekonomista no akademista husi Malázia), Helena Rodrigues (Portugal), Rina Zun (IWAPI-Ikatan wanita pengusaha indonezia) no Ministru Plano no Finansas, Rui Gomes.

Iha loron hanesan, hahú dader sei iha feira ba produtu lokál husi grupu feto sira ne’ebé preparadu ona no sei tau iha El-Legendariu Novo Turizmu ninia oin to’o loraik.

Eventu ne’e sei loke ba públiku, nune’e emprezáriu sira ne’ebé husi munisípiu bele partisipa iha eventu ida ne’e kualkér ema ida, inklui juventude no públiku inklui se mak interese bele asesu.

Jornalista: Julia Chatarina

Editór : Manuel Pinto

iklan
iklan

Leave a Reply

iklan
error: Content is protected !!