Ministru Administrasaun Estatál, Valentim Ximenes. Foto mídia MAE

DILI (TATOLI) – Governu liuhosi Ministru Administrasaun Eleitorál (MAE), Valentim Ximenes husu ba lider komunitáriu sira atu mobiliza sidadaun hotu hodi hakat ba urna atu ezerse direitu votu iha loron 12 Maiu.

“Ita boot sira mak hela hamutuk ho sidadaun eleitór, partikularmente komunidade jerál iha Bairru, Aldeia no Suku, ita boot sira mobiliza bá” MAE, Valentim Ximenes apela ba Autoridade lokál sira iha sorumutu ho Sekretariadu Tékniku Administrasaun Eleitorál (STAE), ohin.

Tuir nia, Xefe Suku no Membru Konsellu Suku sira nia papél importante atu mobiliza eleitór sira hodi ezerse direitu votu iha tempu eleisaun, maibé keta haluha mós informa ba eleitór atu lori ida-idak nia kartaun eleitorál hodi tuir votasaun.

Povu partisipa iha Eleisaun atu deside futuru nasaun no povu nia moris di’ak, tanba ne’e autoridade lokál tenke mobiliza sidadaun sira idade 17 to’o 80 ka 90 atu bele vota tuir ida-idak nia konxiénsia polítika iha loron votasaun nian.

Nune’e mós, partidu polítiku sira tenke mobiliza nia simpatizante sira atu ba urna hodi bele ezerse direitu votu ba iha ida-idak nia partidu.

“Governu alerta ba sidadaun sira katak, tempu votasaun tenke lori ida-idak nia kartaun eleitorál hodi ba vota, labele lori deklarasaun mudansa rezidénsia atu ba ezerse direitu iha loron eleisaun,” Valentim fó hanoin tan.

Iha fatin hanesan, Diretór Jerál Sekretariadu Tékniku Administrasaun Eleitorál (STAE), Acilino Manuel Branco, ohin realiza enkontru ida ho Ministru Valentim Ximenes ho autoridade lokál sira hodi informa kona-ba preparasaun órgaun eleitorál nian ba autoridade lokál sira.

Aleinde ida ne’e, informa mós kona ba mudansa rezidénsia nian. Nune’e, lider komunitáriu sira bele ba informa fali komunidade sira ka eleitór hotu atu bele esklaresidu, nune’e iha tempu votasaun ema labele konfunde.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here