DÍLI, (TATOLI)-Hakerek hanesan loromatan nia roman-riin ne’ebé leno borus ema-nia isin tomak, ema-nia laran tomak, no leno hakbiit povu ida-nia klamar, rai-ida nia klamar, no kultura ida nia klamar atu labele mate no la mate tan.

Ne’e mak afirmasaun badak eskritór livru istória ho títulu “Eroi Loromatan” ne’ebé imprime ona husi gráfika Taliti, hodi tama ona ba merkadória, ne’ebé oras ne’e dadaun sei iha faze promosaun, Ajénsia TATOLI asesu, ohin, iha ACAIT-Díli.

“Loromatan hakerek ‘mundu’ ho nia roman, ha’u hakerek ‘ita-nia mundu’ ho liafuan domin,” afirma autór livru antolojia istória badak ho pájina 233, nu’udar edisaun dahuluk, Cancio Cassimata.

Iha prelúdiu livru ne’e, “Cassimata” akresenta katak livru antolojia istória badak “Eroi Loromatan” nia prezensa sai hanesan evidénsia ka prova ida kona-ba hanoin nakloke iha komunikasaun no informasaun, inklui iha atividade diária sira, liliu iha nia atividade jornalístika sira durante hala’o kna’ar nu’udar jornalista.

Liuhusi livru ne’e, iha prosesu hakerek nia laran, nia haktuir katak nia hetan evidénsia forte ne’ebé halo nia admira ba liafuan kmanek sira-nia sabór ne’ebé koko iha atividade kreativu nia laran.

“Maka hanesan, tempu iha limitasaun, maibé imajinasaun la iha limitasaun. Seluk, hanoin ne’e serbisu todan, maibé sai hanesan esforsu ida ne’ebé sei iha folin,” dehan eskritór livru antolojia istória badak ne’e, iha préludiu livru ne’e nian.

Eskritór Cancio “Cassimata”  informa katak livru antolojia istória badak “Eroi Loromatan” [livru dahuluk] nu’udar obra jornalístiku no obra literature husi jornalista timoroan, ne’ebé halibur istória badak hamutuk 14 ne’ebé publika tiha ona iha jornál Timor Post hahú husi périodu 2005-2010.

Livru ne’e mosu ho intensaun atu dezenvolve no haloko [menjunjung tinggi] lia tetun liuhusi hakerek istória fiksaun no naun-fiksaun sira ne’ebé bazea ba ortografia padronizada INL [Institutu Nasionál Linguístika]. “Livru ne’e, nu’udar evidénsia ida husi jornalista mututaba [ la’ós muturabu] ida nia kontribuisaun ba dezenvolvimentu nasionál,” nia subliña.

Livru “Eroi Loromatan” hanesan “Loromatan Inspirasaun” ida ne’ebé leno sosiedade Timor-Leste nia neon atu hadeer, hodi haree ba sira-nia moris rasik, ba sira-nia terus rasik, ba sira-nia kultura rasik, ba sira-nia rai nia moris, no ba sira-nia istória pasadu be kruel tebes.

Tanba, ‘hakerek hanesan loromatan nia roman-riin ne’ebé leno borus ema-nia isin tomak, ema-nia laran tomak, no leno hakbiit povu ida-nia klamar, rai-ida nia klamar, no kultura ida nia klamar atu labele mate no la mate tan. Loromatan hakerek ‘mundu’ ho nia roman, ha’u hakerek ‘ita-nia mundu’ ho liafuan domin’. “Watu ai misa. Watu na’u-gi kereke nai-makasae. Loromatan sa’e ona. Loromatan hakerek nafatin,” Cassimata konklui.

Jornalista: Rafy Belo

Editór : Manuel Pinto

1 KOMENTÁRIU

HAKEREK NO HATÁN

Please enter your comment!
Please enter your name here