Foto google.

DILI, (TATOLI) – Diretór Jerál Peska, Ministériu Agrikultura no Peska (MAP), Acácio Guterres, hatete prezensa ró ilegál iha tasi-mane kontinua aumenta, maibé ministériu to’o ohin loron seidauk bele halo buat ida atu kombate tanba laiha meiu.

“Ró ne’e sai husi Bali (Indonézia) depois nia dalan ne’e filafali bá Bali. Ita só haree liuhusi satélite, monitoriza hela sira mai ka’er ikan, uza ekipamentu saida ne’e ita hatene hotu, ró nia naran no sai husi ne’ebé ita hatene hotu, maibé to’o ohin loron ita seidauk bele halo buat ida”, Acácio hatete iha Komoro, ohin.

Nune’e Diresaun Jerál só informa de’it ba Komponente Navál no Polísia Marítima, mas instituisaun rua ne’e mós laiha kapasidade atu to’o fatin refere tanba laiha meius ne’ebé suporta.

Volume ró ilegál ne’e kada loron kuaze 50 to’o 60. “Kada loron ita monitoriza aumenta ba beibeik, téknikamente kalkula ikan hira mak lakon iha tasi-laran ho valór osan millaun 250 resin, mas presu ne’e ita haree ba espésie ikan ita tau dois vezes pur dois dólares mak hetan 250 millaun ne’e, maibé realidade iha merkadu ne’e folin lahanesan, balun aas liu no balun ki’ik”.

Autoridade ministériu ne’e dehan informa beibeik ba instituisaun relevante. “Ami sempre ko’alia ho ministru para apoiu másimu ba ita-nia seguransa rua ne’e (Komponente Navál no Polísia Marítima) atubele to’o iha parte súl, liuliu iha tasi Timór tasi boot ne’ebé presiza ró boot”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here