DILI (TATOLI)—Responsável Koperativa Boneka Ataúro, Pe. Luigi Fornasier ho nia komitiva hala’o enkontru ho Prezidente Repúblika, Francisco Guterres Lú Olo, ho objetivu husu empresta rai Estadu nian atu hala’o atividade koperativa boneka.
Koperativa Boneka Ataúro hala’o ninia atividade durante tinan sanulu ona iha rai Estadu nian iha Ataúro Vila, tanba ne’e sira hakarak kontinua empresta rai refere ba tempu ruma tan.
“Ami nia vizita atu husu tulun tanba Ataúro sai esperiénsia karáter sosiál. Ami presiza hametin esperiénsia sira ne’e tanba fó serbisu ba ema barak. Ami iha Boneka Ataúro, iha Restaurante Manu Kokorek, iha Biojoia no agora iha tan projetu foun maka Projetu Turizmu Komunitáriu lokaliza iha Makili (Ataúro),” Pe. Luigi Fornasier hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, segunda ne’e, hafoin enkontru ho Xefe Estadu Lú Olo.
Nia haktuir Koperativa Boneka ne’e fó serbisu ba feto hamutuk ema na’in 62. “Buat importante liu maka laiha karáter kapitalista, katak laiha ema ruma ne’ebé ukun no esplora. Esperiénsia sira ne’e koperativa. Katak, hotu-hotu sai na’in ba koperativa. Ida ne’e sistema ne’ebé justu,” Padre ne’e esplika.
Pe. Luigi afirma sira la presiza apoia finanseira tanba esperiénsia sira ne’e konsege sustenta án rasik maske osan ne’ebé tama la boot—empregada hamutuk 62 ne’e semana-semana simu osan hosi koperativa dollar amerikanu 24,00. no bainhira tinan ida ramata sei fahe ba malu osan ne’ebé resin.
Iha biban ne’e, Pe. Luigi hateten, Prezidente Repúblika, Francisco Guterres Lú Olo, aseita pedidu empresta rai ne’e.
Jornalista: Xisto Freitas
Editór : Manuel Pinto
