DILI (TATOLI)-Ministru Administrasaun Estatál, Valentim Ximenes hatete, Gráfika Nasionál sei finaliza impresaun Bulletin Votus ba Eleisaun antisipada iha semana ida ne’e. Bulletin Votus ne’ebé gráfika imprime hamutuk 784,286, bazeia ba rekomendasaun STAE.
ʺOhin ou aban, sira Gráfika Nasionál imprime hotu ona,ʺ Ministru Valentim informa ba Jornalista sira iha Palásiu Governu Dili, Ohin.
Nia dehan tan, prosesu impresaun ne’e la’o di’ak no asegura ninia segredu. Tanba ne’e, Gráfika Nasionál sei entrega ba Servisu Tékniku Administrasaun Eleitorál hodi realiza EA iha loron 12 Maiu 2018.
Aleinde de ida ne’e, governu aloka mós osan ho montante millions 4.7 dolar Amerikanu ba Servisu Tékniku Administrasaun Eleitorál hodi hodi hala’o servisu tékniku ba eleisaun antisipada.
ʺOrsamentu ne’e maximum ona para STAE bele halo servisu,ʺ Valentim haktuir tan.
Utilizasaun orsamentu ne’ebé iha sei kobre ba servisu prosedimentu tékniku hanesan resenseamentu eleitorál, publisidade no seluk tan.
ʺEntermus ezekusaun la’o di’ak no laiha obstákulu maski osan ministériu Finansas fó osan ba STAE iha períodu ida badak,ʺ Valentim relata.
Jornalista: Agapito dos Santos
Editór : Manuel Pinto
