DILI (TATOLI)— Associação dos Ex-Prisioneiros Políticos de Timor-Leste (ASSEPOL) rekoñese katak durante tinan sanulu resin lima, ukun na’in sira hatudu, susesivamente, progresu lubuk ida iha konstrusaun Estado no dezenvolvimentu nasionál.

ASSEPOL mós aponta katak sei iha dezafiu lubuk ida Timor hasoru daudauk no barak sei tuir mai. Estado, liu husi líder hamutuk ho sidadaun tenke iha kapasidade nafatin atu hamiis dezafiu hirak ne’e no garante dezenvolvimentu ba povu hotu nia moris di’ak.

Tuir nota komunidadu Imprensa ne’ebé Ajénsia Tatoli asesu ohin, ASSEPOL hakarak afirma katak RDTL ho nia interese no soberania sai buat ida de’it (uno), ne’e katak pertense ba timor oan hotu no indivizivel, la pertense ba ida nein bele fahe, no tenke sai responsabilidade sidadaun RDTL hotu-hotu nian, la haree ba nia rasa, grupu saida de’it, relijiaun ka konviksaun polítika.

ASSEPOL akompaña ho atensaun ba fenómenu foun ne’ebé mosu iha prosesu eleisaun antesipada, bainhira partidu istóriku no aliansa husi partidu halo aprosimasaun ativu ba grupos determinados. ASSEPOL hakarak enkoraja partidos politikus no Aliansa partidarias, bainhira hetan fiar kaer ukun karik, atu envolve ema hotu-hotu iha prosesu konstrusaun Estadu no dezenvolvimentu nasionál no asegura katak labele hela grupu balun margenalizado durante prosesu nia laran.

ASSEPOL hakarak haksolok ho nia membru lubuk ida ne’ebé kaer mós knar importante iha partidu polítiku oin-oin, iha instituisaun Estado, iha instituisaun non-governamental ka iha instituisaun emprezariál, hodi fó kontinuidade ba obra bo’ot ne’ebé falta atu kompleta, maka liberta povu husi obskurantismo, husi kiak no mukit no husi atrazu.

Nune’e ASSEPOL hakarak manifesta orgulho no onra bo’ot ba eis dadur maluk polítiku sira ne’e hotu, iha partidu polítiku ne’ebé de’it, sai líderes ka kuadros responsáveis, militantes ka simpatizantes deit;

Ho esperansa tomak, ASSEPOL hakarak tau fiar ba maluk antigus prizioneirus politikus sira atu tane nafatin valores ne’ebe sai razaun ba sakrifísiu  hotu-hotu nian;

Husu ba membros hotu-hotu atu kontribui ba kria ambiente pasífiku, demokrátiku, no respeita malun durante kampaña polítika to’o votasaun iha eleisaun antesipada ne’e.

Husu ba membros sira atu ezerse didi’ak ita nia responsabilidade polítika nu’udar sidadaun ho konxiénsia no sentidu Estadu;

Husu ba membros sira ne’ebé kaer knar iha partidu polítiku ka iha instituisaun Estado, atu asegura nafatin sentidu Estadu hodi tau interese Estado aas liu interese seluk.

ASSEPOL husu mós Ba lider Partidos politicos hotu-hotu ho organizasaun afiliados sira atu kontrola no uza language ne’ebé edukativu no informativu durante kampaña;

Ba partidos politikos sira, liu husi plataforma oin-oin, koligasaun, aliansa, frente ka movimentu atu asegura prosesu kampaña no eleisaun ida pasífiku, demokrátiku, respeita malun nafatin no kumpre normas no prosedimentu iha prosesu tomak;

Ba eleitores hotu atu ezerse didiak ita nia responsabilidade politika hodi ba vota ho konxiénsia tuir ida-idak nia opsaun polítika;

Ba órgaun eleitorál, hanesan CNE ho STAE, ba instituisaun ne’ebé garante seguransa no estabilidade, hanesan PNTL no F-FDTL atu servisu ho profisionalizmu, imparsialidade no integridade durante prosesu eleisaun tomak;

Ba lideres Partido Politico hotu-hotu, organizasaun afiliados sira no povu tomak atu hatudu aten barani no maturidade polítika hodi simu rezultadu eleisaun ne’ebé tuir mai, hatudu respeitu malun no halo komunikasaun polítika ba malun nafatin hodi garante funsionamentu normal órgaun soberania hotu-hotu iha Timor-Leste.

Tinan 15 hafoin Restaurasaun Independénsia Nasionál

Tinan 15 hafoin Restaurasaun Independénsia Nasionál, Povu Timor-Leste hasoru eventu polítiku lubuk ida ne’ebé dezafia povu nia maturidade polítika, ukun na’in nia kapasidade lideransa no jestaun Estado nia interese.

Kada tinan lima,  liu husi eleisaun hahú 2002, sai oportunidade la’ós de’it ba husu povu nia konfiansa polítika atu ukun maibé mós, dezafia lider sira nia vontade no kapasidade atu tradús povu nia konfiansa ba konsolidasaun soberania Estadu no hadi’a povu nia moris.

Iha eleisaun parlamentár tinan 2017, povu atribui konfiansa ba partidu polítiku lima hodi forma asentu parlamentár iha Parlamentu Nasionál, hafoin halo komunikasaun polítika hodi forma Governu VII. Infelizmente mosu impase polítiku no fo’o biban ba Presidente da Repúblika konvoka eleisaun antesipada.

Eleisaun Antesipa da nu’udar esperiénsia foun iha moris demokrasia iha Timor-Leste. Dala ida tan, povu hakarak husu ita atu hanoin kle’an no luan liu konaba podér polítiku, sentidu Estado, kontinuidade lideransa no jestaun Estado hodi hetan kbi’it atu konsolida soberania Estado no prepara servidór Estado ho integridade no profisionalizmu.

ASSEPOL preokupa ho situasaun polítika,  klima lideransa ne’ebé evolui daudauk iha Timor-Leste, no preokupa mós ho prosesu tranzisaun gérasionál lideransa estadu nian. Lider perece, Estado permanence.

ASSEPOL observa katak, hahú 2017 mai, karik tanba natureza umana, konjuntura sósiu-polítiku hahú husu dinámika iha transferénsia lideransa entre gerasoens. Ezije ba futuru lideransa atu hatudu kbiit no boa vontade hodi asegura transferénsia gerasional la’o seguru, estruturado, organizadu no pasífiku hodi garante kontinuidade ba funsionamentu no konsolidasaun  Estado de Direitu Democratico ne’ebé, nia soberania no podér polítiku rezide iha Povu.

(Mídia ASSEPOL)

HAKEREK NO HATÁN

Please enter your comment!
Please enter your name here