Treinamentu. Foto: Acbit

DILI, (TATOLI) – Universitáriu sira husi ensinu superiór sira iha Dili laran hamutuk na’in 22 tuir treinamentu kona-ba oinsá hakerek istória vítima nian no halo dokumentasaun inklui halo entrevista.

Atividade treinamentu ne’e organiza husi Acbit (Asosiasaun Chega ba Ita) no fasilita husi Atika Nuraini, fasilitadór ida husi AJAR (Asian Justice and Right), iha salaun HAK, Palapasu-Dili, ohin.

Iha treinamentu ne’e, fasilitadora Atika Nuraini haktuir hakerek istória vítima, iha buat importante haat, hanesan faktu ka akontesimentu, impaktu, sentimentu negativu (ta’uk, hirus) no pozitivu (kontente, esperansa) ita bele esplora husi vítima sira hodi hakerek sira-nia istória ho di’ak no efetivu.

Nune’e mós uza formula 5W + 1H (who, what, where, when, why ho how) katak saida mak akontese ona ba vítima sira, sémak vítima, sémak autór ka suspeitu husi kazu ruma no tanbasá kazu ne’e akontese no oinsá nia akontesimentu ka kronolojia.

“Hirak ne’e hotu bainhira ita hakerek uza event based methodology ka metodolojia bazea ba eventu”, hateten fasilitadora, Atika Nuraini, perante estudante sira husi universidade públika no privada sira.

Diretora Acbit, Manuela Leong Perreira, ba TATOLI, iha marjen treinamentu ne’e katak objetivu treinamentu ne’e mak treina no motiva estudante sira atu bele hakerek istória vítima, husi família rasik, ho maneira ne’ebé mak simples depois transforma ba livru hodi entrega fali ba família vítima.

Diretora Manuela Leong espera ho treinamentu ne’e, depois treinamentu, iha abilidade bázika hodi hakerek istória vítima no istória interesante sira. La’ós kona-ba istória fatuál de’it, maibé istória ne’ebé mós kompostu husi faktu no sira-nia sentimentu rasik, pozitivu, negativu nomós impaktu saida mak sira hasoru agora, hanesan aktus ne’ebé akontese husi konsekuénsia violénsia.

“Pois husi sira-nia skill (abilidade) ne’e, sira mós koko hakerek istória ne’ebé mak di’ak, dokumentasaun; entaun sira halo istória singkat (badak), istória menarik (interesante) ba sira-nia família ho hakerek nomós dokumentasaun”, konklui diretora Manuela Leong Perreira.

Estudante sira ne’ebé partisipa iha treinamentu ne’e, molok halo prátika kona-ba oinsá halo entrevista no hakerek istória vítima, durante prosesu treinamentu, sira foti konkluzaun katak importansia husi hakerek istória mak família, komunidade no sosiedade bele hatene istória vítima nian.

Nu’udar prosesu rekuperasaun no korajen ida ba vítima sira ne’ebé esperiénsia hetan violasaun iha tempu pasadu no fó onra no dignifika hikas vítima sira.

Enkuantu, importánsia husi ita hakerek istória kona-ba ita-nia família rasik mak hakerek hikas ita-nia istória no hakbesik relasaun família, entre ita no ho família seluk.

Istória sira ne’e bele hakerek ho maneira husi leten ba karaik (top down) no husi  karaik ba leten (botton up) katak istória bele hakerek husi pesoál ka família, sosiedade ka suku nomós nasaun ka estadu, vise-versa, nune’e it abele iha istória rasik no sai identidade ita nian.

Jornalista: Rafy Belo

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here