Manelito Carrascação. Foto espesiál

DILI, (TATOLI) – Hanoin hikas ba kotuk, ohin loron nu’udar tinan 19, Manelito Carrascalão husik mundu, mate barbaramente husi liman kro’at Indonézia sira nian, tan defende maluk timoroan sira, ho liman mamuk, ne’ebé refujia, iha nia rezidénsia, atuál Fundação Oriente. 

Família matebian ida, Maria Ângela Carrascalão ba TATOLI, tersa ne’e, iha Ministériu Justisa, Kolmera, katak hanesan família, hanesan umanu, hakarak justisa, maibé hanesan timoroan ne’ebé serbisu ba governu, estadu, tuir de’it intedimentu estadu nian, tanba haree ba estabilidade.

“Dehan hanesan família, ha’u hakarak dehan justisa maibé buka took justisa ne’e ida ne’ebé? Hanesan ema ha’u hakarak justisa mas hanesan timoroan serbisu iha Ministériu Justisa, ha’u mós hatene katak estadu iha intendimentu diferente, tanba estadu halo ona rekonsiliasaun i amizade ho Indonézia, tanba ita rai ki’ik, ita tenke haree estabilidade nasaun nian ne’e”, dehan família Manelito, Maria Ângela Carrascalão

“Purtantu, buat ida esensiál, sentidu pesoál, buat seluk ema hanesan estadu, serbisu iha governu ha’u tenke tuir saida mak estadu halo”, nia reforsa tan.

Tinan 19 ona, saudozu Manelito Carrascalão lakon nia vida tan rai nomós povu ida ne’e. Nia mate ho asaun brutalidade ho otas 17 de’it.

Nune’e, família vítima Manelito, Maria Carrascalão sujere katak primeiru, joven sira agora tenke estuda estuda para hasai kursu, para bele kontribui ho didi’ak ho kursu idaidak nian ba Timor-Leste.

Segundu, kuandu hasai kursu, ita-nia neon mós loke ona, ulun mós intelejente liu, lalika kaer rama ambon atu konstrui sidadania timorense para bele konstrui estadu, iha ne’ebé ita bele moris ho paz, trankilidade, kalma.

Diretór Asosiasaun HAK, Manuel Monteiro, hateten Kazu ne’e, iha konstituisaun Repúblika, iha artigu 160 ko’alia, krime ne’ebé akontese iha tempu pasadu ne’e, konsidera nu’udar krime kontra umanidade ka krime funu ninian, tenke prosesa.

“Iha prosesu ita-nian, krime grave ne’e la’o duni, mas soké iha 2014, sestu governu hasai rezolusaun ida hodi hasai juíz internasionál sira, afeta kedas ba artigu 163 konstituisaun repúblika, ne’ebé ko’alia kona-ba kompozisaun juíz sira, atu halo prosesa, julgamentu ba krime grave, krime kontra umanidade sira, labele. Labele tanba ne’e mak kazu sira ne’e pendente hotu iha tribunál”, dehan Monteiro ba TATOLI.

Hatutan tan: “Ita hein katak governasaun foun mai, bele revoga fila fali rezolusaun ne’e, kazu krime sira ne’e, bele prosesa tuir lei hateten”.

Konstituisaunn artigu 160  (Krime boot sira), hahalok sira-ne’ebé halo husi loron 25 abríl tinan 1974 to’o loron 31 Dezembru tinan 1999, ne’ebé bele konsidera nu’udar krime hasoru umanidade, jenosídiu ka funu nian, nia prosedimentu kriminál tenke hala’o iha tribunál nasionál ka internasionál sira.

Artigu 163 (Organizasaun Judisiál iha Tempu-leet), 1. Instánsia judisiál koletivu ne’ebé iha Timór-Leste, ne’ebé juís nasionál no internasionál sira integra, ho kompeténsia atu halo julgamentu ba krime boot sira ne’ebé ema halo husi 1 janeiru to’o 25 outubru 1999 hala’o nafatin ba tempu ne’ebé presiza duni atu remata prosesu sira-ne’ebé halo hela investigasaun ba.

Alinea 2) Organizasaun judisiáriu ne’ebé iha Timór-Leste laran bainhira Lei-inan ne’e tama iha vigór sei la’o nafatin to’o bainhira sistema judisiáriu foun harii no hahú nia kna’ar.

Saudades eterna! Hakmatek ba nia klamar iha lalehan.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here