iklan

LAUTÉM, MUNISÍPIU

Ezijénsia Abitante Iliomar Mak Estrada Atu Liga Sira Ba Merkadu

Ezijénsia Abitante Iliomar Mak Estrada Atu Liga Sira Ba Merkadu

Administradór Postu Administrativu Iliomar, João Batista Ruas.

ILIOMAR, (TATOLI) – Maioria abitante Iliomar moris ho agrikultór. Husi totál populasaun 10.846 ne’ebé iha, ruanulu-resin mak sai hanesan negosiante no loke kompañia, nune’e ezijénsia dahuluk ne’ebé populasaun ne’e iha maka asesu ba estrada atubele lori sira-nia produtu liga ba merkadu.
Administradór Postu Administrativu Iliomar, João Batista Ruas, hatete ezijénsia dahuluk mak estrada tanba daudaun ne’e sei aterru netik ho rai nune’e sei di’ak, maibé tempu udan susar.

“Ba bee no eletrisidade sei sufisiente no iha aldeia rua ka tolu mak eletrisidade seidauk hetan mas kuaze suku neen ne’e hetan hotu ona”, katak Ruas iha nia edifísiu Iliomar Vila, kinta ne’e.

Martinho Ximenes, abitante iha suku Aelebere dehan difikuldade mak estrada husi Lospalos mai Iliomar nomos eletrisidade.

“Eletrisidade ne’e ami hetan ona (iha Iliomar vila) mas ami-nia maluk sira iha rurál balun seidauk hetan. Ami sente hetan ona naroman no ami kontente mas ami hanoin fali ami-nia maluk ida seidauk hetan, ida ne’e mak ami-nia preokupasaun”.

Aleinde ajuda ba ema kbiit la’ek sira ne’ebé mak iha fatin ne’e to’o agora seidauk hetan saida mak husi Governu atu ajuda hodi atende sira-nia problema.

“Ami komunidade ejije loos durante ukun-aan tinan 15, buat balun iha ona, maibé seidauk kompleta ba povu tomak”.

Ba na’in ulun ne’ebé atu sai ukun na’in iha rai ida ne’e presiza hanoin saida mak seidauk akontese iha povu sira leet. “Ida ne’e mak ami komunidade nia ezijénsia”.

Hatutan sobre saúde eziste postu, maibé difikuldade mak fasilidade tanba iha karreta no motorizada ida de’it dalaruma aat no bainhira atu tula moras mós sai tarde.

“Ba ida ne’ebé mak atu ukun bele halo atendimentu ho reál labele haree pesoál ida-idak, nu’udar komunidade la aseita ida ne’e. Ida ne’ebé mak atu sai ukun na’in karik haree ema hotu-hotu, labele haree ida ne’e mak ha’u-nia ema no ida ne’e mak hili ha’u no ida ne’ebá la’e, ida ne’e ami lakohi”.

Tanba sai ukun na’in ne’e ba ema hotu nian labele ema ida ka rua nian de’it. Abitante iha suku Aelebere barak mak ho vida toos no natar, nune’e nesesidade ne’ebé atu apoia sira mak presiza irrigasaun ba sira halo natar no sobre toos seidauk iha rezultadu di’ak tanba presiza apoia husi tékniku sira atu hasa’e sira-nia produtu iha toos hodi lori bá merkadu.

Xefe Suku Iliomar II, Adelino Barreto, hatutan ezijénsia hanesan mak dalan tanba aldeia ida liga ba aldeia seluk kuaze laiha, no aldeia tolu mak seidauk iha eletrisidade no bee moos.

“Se Governu mai ne’ebé agora halo kampana hela programa, hanoin aban-bainrua bele hanoin oinsá mak implementa serbisu tuir komunidade nia hakarak .Tanba ita iha área rurál ne’e buat hotu laiha”.

Aleinde kona-ba postu saúde daudaun ne’e seiduak eziste iha suku ne’e no abitante sira balun tenke la’o kilómetru hotu hodi bá postu saúde nian.

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!