Diretór ESTV-GTI, Francisco Guterres.

DILI, (TATOLI) – Alumni estudante Eskola Sekundáriu Tékníku Vokasionál-Grupu Teknolojia Indústria (ESTV-GTI) Bekora hamutuk 60 liu selesaun hodi tuir formasaun lian Korea hodi servisu iha Korea Súl.

Alumni hosi anu letivu 2007 to’o 2017 ne’e kompostu hosi departementu konstrusaun sivíl, mekaníka produsaun, eletrisidade, eletrónika no informátika.

Diretór ESTV-GTI, Francisco Guterres, hateten programa ne’e hetan apoiu finanseira hosi Governu Korea liuhosi ajénsia koperasaun KOIKA (Korea International Cooperation Agency) no servisu hamutuk ho Ministériu Edukasaun inklui ESTV-GTI Bekora.

Tuir oráriu formasaun ne’e sei hahú iha 23 abril to’o jullu 2018 durante oras haat kada loron. “Depois remata voluntáriu Korea sei halo prosesu selesaun ba formandu sira hodi ba servisu iha Korea Súlʺ, hateten Diretór ba Tatoli iha Bekora, ohin.

Formasaun ne’e faze dahuluk, tuir planu hosi Governu Korea no ajénsia KOIKA sei kontinua loke formasaun ne’e iha etapa tuir mai.

Alende formasaun ba lian tuir polítika formandu sira mós sei aprende kona-ba desportu fíziku, koñesementu tékniku, koñesementu ambientál hodi apoiu formandu sira bainhira servisu iha Korea.

Entretantu, alumi 184 maka hatama aplikasaun maibé ema 60 voluntáriu Korea hili hafoin tuir teste iha semana kotuk.

Jornalista: Agapito dos Santos

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here