Komandante Polísia Eskuadra Venilale, Cosme dos Santos Mendes. Foto Tatoli/Maria Auxiliadora

VENILALE, (TATOLI) – Tuir oráriu ne’ebé fó sai  husi Komisaun Nasionál Eleisaun (CNE-sigla portugés),  Movimentu Dezenvolvimentu Nasionál (MDN) nia atividade  kampaña fahe stiker hahú iha suku Berkoli, Postu Administrativu Venilale, Autoridade Munisipál Baukau, maibé bainhira forsa seguransa sira husi Polísia Nasionál Timor-Leste (PNTL) eskuadra Venilale  atu asegura atividade ne’e, lahetan partidu refere halo nia kampaña.

Komandante Polísia Eskuadra Venilale, Cosme dos Santos Mendes, hatete iha loron dahuluk kampaña hala’o iha suku Berkoli, maibé bainhira parte seguransa sira buka Movimentu ne’e iha Berkoli laran tomak lahetan partidu ne’e.

“Ami-nia preokupasaun mak ne’e, oráriu sai tiha númeru kontaktu partidu nia iha karik ita liga ba para ami hatene paradeiru iha ne’ebé para diretamente bá akompaña sira-nia programa”, komandante hatete iha  eskuadra polísia, kuarta ne’e.

Tanba laiha liña komunikasaun ida ne’ebé di’ak maka polísia buka atividade kampaña ne’e, maibé lakonsege hetan.

Maski nune’e iha loron daruak MDN kontinua nia kampaña fahe stiker iha Venilale Vila mas ladauk hetan sira-nia prezensa no forsa seguransa kontinua buka no hein to’o oráriu ne’ebé determina hahú husi tuku 8:30 to’o 18:30 hanesan ho loron dahuluk nian.

“Ami prontu nafatin akompaña sira-nia programa, problema ida mak laiha liña komunikasaun di’ak ami difísil hatene sira-nia paradeiru”.

Hatutan antes kampaña iha postu refere PNTL ho lider partidu sira iha postu refere iha koordenasaun ne’ebé di’ak oinsá mak bele hametin estabilidade iha Venilale ne’e la’o ho di’ak.

Entantu preokupasaun  durante kampaña mak bainhira udan forsa polítika balun ne’ebé hala’o programa iha suku ne’ebé la asesu ba estrada ou kondisaun aat maka sei difikulta sira-nia atividade maski iha transporte (karreta ida) ne’ebé natoon atu apoia sira.

Administradór Postu Venilale, Carlos Alberto Guterres, hatutan horisehik lahetan informasaun kampaña MDN nia, maibé oráriu ne’e iha maski larealiza no ohin (11/4) mós seidauk hetan atividade husi partidu ne’e.

Koordenadór CNE Venilale, Eugenio Cosme Guterres, katak oráriu ne’ebé aprova husi CNE, MDN mak hala’o kampaña dahuluk iha Venilale, maibé dezde horisehik no ohin hein nafatin mas laiha ema ida mak mosu no CNE hein de’itt to’o oras ne’ebé determina atu observa nafatin tanba fatin ne’ebé atu halo kampaña ladún klaru.

Jornalista: Maria Auxiliadora

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here