Ezemplu pagamentu eletroniku. Foto espesial

DILI, (TATOLI) – Autoridade Aduaneira hamutuk ho Komisaun Reforma Fiskál (KFP) halo kooperasaun ho Banku Nasionál Ultramarinu (BNU) Timor (Caixa Geral de Depósitos, S.A. – Reprezentasaun Permanente) kuarta ne’e hodi asina Protokolu Kooperasaun ba Pagamentu Elektróniku ho sistema Terminál Pagamentu Automátiku (TPA) iha Autoridade Aduaneira.Tuir tuir nota komunikadu ne’ebé TATOLI asesu pagamentu elektrónika ne’e sei hahú iha loron 1 maiu 2018 iha aeroportu Dili no edifísiu sentrál aduaneira no ba implementasaun iha Fronteira Batugade no Suai.

Diretór Jerál Autoridade Aduaneira, José Fatíma Abílio, hateten sira nia parte iha kompromisu harii administrasaun aduaneira ne’ebé modernu no transparente.

“Ami iha kompromisu atu estabelese administrasaun aduaneira ida ne’ebé modernu no transparente. Esperiénsia tékniku no produtu ne’ebé fornese husi BNU sei ajuda alfándega atu hapara modelu pagamentu ho osan/cash diretamente ba tarefa no taxa alfandegáriu”, tenik.

Tuir nia ne’e faze signifikativu ida atu alkansa objetivu reforma aduaneira no apoia implementasaun prinsípiu legalidade ida.

Nune’e mós Diretora Jerál Adjunta BNU Timor, Carolina Garcia Letra, hateten BNU sai pioneiru ba sistema pagamentu eletróniku iha kolesaun reseita ba governu no sei oferese kooperasaun totál hodi implementa protokolu ne’e.

Alende ne’e Koordenadora Reforma Fiskál, Fernanda Borges, reforsa pagamentu automatizasaun iha alfándega nesesáriu hodi hasa’e efisiénsia iha kolesaun reseita, fó serteza ba importadór no públiku katak reseita ne’ebé koleta, hatama ba Estadu no fasilita komérsiu hodi diversifika no haforsa ekonomia.

Entretantu, ida ne’e marka tan etapa importante ida iha programa reforma fiskál hodi implementa kódigu aduaneiru no hadi’ak kapasidade autoridade aduaneira hodi koleta reseita, redús tempu atu prosesa importasaun no esportasaun hodi fasilita komérsiu ho maneira seguru no transparente.

Tanba ne’e Ministériu Planu no Finansa liu husi Komisaun Reforma Fiskál sei kontinua servisu hamutuk ho Banku Sentrál Timor Leste (BCTL-sigla portugés) hodi kria kapasidade atu asesu ba fasilidade pagamentu eletróniku seluk no envolve banku seluk iha futuru.

Jornalista: Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here