DILI, (TATOLI) – Komandu Polísia Nasionál Timor-Leste (PNTL) no FALINTIL-Forsa Defesa Timor-Leste (F-FDTL) hateten sei garante estabilidade no hakmatek durante períodu kampaña, loron eleisaun antesipada to’o formasaun Governu da-ualu.
Xefe Estadu Maior F-FDTL, Majór Jenerál Lere Anan Timur no Komisáriu PNTL, Júlio da Costa Hornay apela durante hasoru malu ho komandante PNTL munisípiu 13 inklui F-FDTL iha kuartel jerál F-FDTL Fatuhada, ohin.
“PNTL no F-FDTL prontu ona servisu hamutuk hodi asegura seguransa ba eleisaun antesipada, maibé ami mesak sei labele bainhira la hetan kontribuisaun hosi povu, PNTL sei hatun ninia efetivu tomak”, dehan komisáriu PNTL, Júlio da Costa Hornay.
Instituisaun rua ne’e iha ona planu no koordenasaun di’ak hodi asegura seguransa, liuliu pasa revista maka’as ba sasan kro’at, arma branka, atributu arte-marsiais no seluktán hodi fó sansaun ho rigór bazea ba lei númeru 5/2017, 19 marsu.
Militante labele viola kódiku estrada hanesan uza motor kanu resin, la uza kapasete, tula ema liu nain rua no dokumentu motor no kareta tenke kompletu.
Tuir Hornay bainhira la kumpri, PNTL no F-FDTL sei apreende hodi prosesa tuir lei. “PNTL no F-FDTL iha kompromisu ida de’it maka eleisaun ne’e tenke la’o ho hakmatek no susesu, ami prontu fornese pás no estabilidade ba povu atu ezerse diretu votu ba eleisaun antesipada”, hateten komisáriu.
Entermu lojístiku, tranporte no preparasaun seluk, instituisaun rua ne’e preparadu destaka iha terenu.
Entretantu, Tuir Majór Jeneral Lere, atu garante estabilidade no hakmatek, polísi no FDTL tenke imparsiál no neutru, la halis ba partidu polítiku.
“Ohin ha’u rona no ohin tenke sai ba para halo polítika, tanba instituisaun rua ne’e tenke imparsial no neutru”, apela Lere.
Lere oreinta katak tenke kaptura no apreende sidadaun ne’ebé tenta hamosu instabilidade, militante ne’ebé laiha sivilizasaun, hasai lia-fuan insulta.
Estatuta orgánika instituisaun rua ne’e defini ona servisu maka seguransa interna no externa maibé bandu prátika no tama partidu polítiku.
Jornalista: Agapito dos Santos
Editora: Rita Almeida
