Prezidente Tribunál Rekursu, Deolindo dos Santos

DILI, (TATOLI) – Prezidente Tribunál Rekursu, Deolindo dos Santos, hateten presiza halo mudansa iha Tribunál Distritál Dili no Tribunál Rekursu.

“Asuntu ne’ebé ohin ha’u ko’alia ho Prezidente Repúblika, Francisco Guterres Lú Olo, maka halo nusa halo mudansa ba Tribnunál Distritál sira nomós iha Tribunál Rekursu rasik para bele halo justisa ho di’ak no lais liu”, Deolindo hato’o ba jornalista sira iha Palásiu Prezidente Nicolau Lobato, Bairru Pité, segunda ne’e.

Nia esplika Tribunál Distritál sira ne’e presiza iha kondisaun ba juiz, ofisiál justisa no funsionáriu sira atu bele halo serbisu no halo mudansa balun ba juiz sira.

“Iha Tribunál Distritál sira liu-liu Tribunál Distritál Dili ne’e la favorável ona. Tribunál Distritál Dili ne’e bainhira ita boot sira (jornalista sira) halo kobertura ba audiénsia julgamentu iha ne’ebá, fatin ne’e laiha kondisaun ona atu juiz sira halo serbisu ho di’ak para bele dudu julgamentu ne’e ho lais tanba espasu ne’e la permite.  Tanba ne’e maka Tribunál iha planu oinsá maka bele harii Tribunál Distritál Dili nian iha tempu badak nia laran”, haktuir.

Iha Tribunál Rekursu, nia hatutan presiza harii fatin serbisu foun ba juiz sira iha Tribunál Rekursu, liu-liu buka posibilidade atu halo konstrusaun ba edifísiu Supremu Tribunál ka Tribunál Rekursu iha futuru no presiza iha promosaun ba juiz sira iha Tribunál Rekursu.

Entretantu, Xefe Estadu fó apoiu tomak ba prosesu ne’ebé maka iha no nia sei akompaña halo oinsá maka bele buat hirak ne’e bele konkretiza. 

Jornalista: Xisto Freitas

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here