Prezidente Republika, Francisco Guterres Lu Olo. Foto Antonio Goncalves

DILI, (TATOLI) – Prezidente Repúblika(PR), Francisco Guterres Lú Olo, alerta ba forsa polítika sira eh lider polítiku sira tantu tuan ka foun katak durante kampaña eleitorál tenke foka liu ba polítika no programa eleitorál hosi forsa polítika ida-idak nian no labele ataka ema.

“Krítika importante tebes bainhira maluk sira ko’alia ba malu, oin ba oin ka liuhosi meiu seluk, bele liuhosi krítika maibé ho laran hakmatek no matenek”, hatete iha nia diskursu asinatura paktu unidade nasionál iha salaun Komisaun Nasionál ba Eleisaun (CNE-sigla portugés) Laline Larigutu, sabadu (7/4).

Pás iha Timor-Leste harii liuhosi sakrifísiu povu nian, povu lakohi rona ataka malu no ataka ema bainhira ema tama ba partidu A eh B.

“Ha’u apela ba lider sira, ba kandidatu hotu, ba ativista sira no sidadaun hotu katak lalika insulta malu maibé lori ita boot sira nia polítika dezenvolvimentu iha kampaña”, katak.

Eleitór sira hakarak rona ParPol ka koligasaun partidária nia programa atu haburas ita rain tanba ne’e kampaña tenke livre no halo ho neon moos no hakarak atu hadia ita nia rain di’ak liu tan.

Prezidente apela tan katak hotu-hotu fó tulun ba eleisaun nu’udar vontade atu hala’o kultura demokrátiku iha Timor-Leste no manan rekoñesimentu no admirasaun hosi komunidade internasionál.

“Ita hotu sei kontribui atu nakfila polítika ba instrumentu dezenvolvimentu atu hatur moris di’ak povu nian”, fó hanoin.

Enkuantu, rai lulik Timor-Leste husu ita hotu nia tulun, ita hotu nia partisipasaun atu tuir beiala sira nia mehi hodi defende ita nia direitu ba dezenvolvimentu, defende Timor-Leste nia direitu ba demokrásia no moris di’ak ba ema hotu nian.

Entretantu, Prezidente husu ba povu atu kontribui hodi garante pás no estabilidade nune’e ita bele atinje prosperiedade moris povu nian.

Jornalista: Zezito Silva

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here