DILI, (TATOLI) – Partidu Frente Revolusionária Timor-Leste Independente (FRETILIN) kompromete bainhira ukun hafoin eleisaun antesipada, sei muda polítika “Hamoos” hosi númeru ikus ba númeru dahuluk.
Antes ne’e, FRETILIN lansa polítika H6, iha ne’ebé polítika “Hametin” maka númeru dahuluk maka “Hametin, hadi’a, haburas, habelar, harii no hamoos”, maibé oras ne’e polítika “Hamoos” maka okupa fali númeru prinsipál (1) maka “Hamoos, Hametin, hadi’a, haburas, habelar no harii”.
“Uluk “H” (Hamoos) ne’ebé ho objetivu atu harahun korupsaun ne’e kolokadu iha númeru ikus, maibé bainhira fila ba ukun, tau fila fali iha oin hodi halakon korupsaun”, Sekretáriu Jerál Organizasaun Juventude FRETILIN, Abrão Saldanha, hato’o iha ninia intervensaun polítika iha konsolidasaun partidu FRETILIN iha Suku Vila Verde, Postu Administrativu Vera Kruz, Munisípiu Dili, sábadu (7/4).
Polítika ida ne’e, nia esplika buka justisa ba orsamentu jerál Estadu (OJE) hamutuk biloen 14 ne’ebé Governu anteriór gasta durante tinan 10 (2007 to’o 2017) maibé la fó rezultadu signifikante ba povu tanba la halo jestaun di’ak ba orsamentu refere.
Líder Organizasaun Juventude FRETILIN ne’e esklarese agora ba oin, kuandu hamoos ona, sei hadi’a fila fali, sei alerta buat ne’ebé ladi’ak, mantein ida ne’ebé di’ak no ida ne’ebé ladi’ak tenke soe.
Jornalista: Xisto Freitas
Editora: Rita Almeida
