DILI (TATOLI)—Ministru Seguransa no Defeza, José Agostinho Sequeira Somotxo hateten Polísia Nasionál Timor-Leste (PNTL) bandu mobilizasaun militante partidu hosi munisípiu ida ba munisípiu seluk.
“Movimentu sira hanesan tula militante sira hosi munisípiu ida ba munisípiu seluk atu halo kampaña ne’e proibidu tanba tempu udan bele akontese dezastre no prevene akontese disturbasaun entre militante partidu sira,” Somotxo hato’o informasaun ne’e ba jornallista sira iha Palásiu Prezidente Nicolau Lobato, Bairru Pité, Dili, sesta ne’e.
Nia informa katak polísia sei halo seguransa másimu iha fronteira kada munisípiu para bele atua mobilizasaun militante sira ne’ebé halo movimentasaun hosi munisípiu ida ba munisípiu seluk, eseptu ema baibain ka kuadru partidu ninian.
“Regra ida ne’e akontese tiha ona iha tinan kotuk. La’ós ha’u sai ministru ne’e maka aplika regra refere,” Somotxo esplika.
Kona-ba seguransa ba kampaña ne’ebé sei hahú iha semana oin, governante ne’e tenik, hahú ohin no aban forsa no segurnasa sei destaka iha fatin ne’ebé previstu tiha ona atu halo seguransa ba eventu demokrátiku ne’ebé atu mai.
(Jornalista: Xisto Freitas)
(Editór : Manuel Pinto)
