DILI, (TATOLI) – Sidadaun Hadomi Dame (SHD/Cidadão Amante da Paz) halo sensibilizasaun kona-ba partisipasaun sidadaun iha eleisaun no prosesu ukun governu nian ba estudante no seminarista Institutu Superiór Filozofia no Teolojia (ISFIT), Jaimé Garcia Goular, Fatumeta, ohin.

“Husu ba povu no sarani tomak iha Timor-Leste, iha dia 10 ita hahú ita-nia kampaña antesipada ba 12 maiu, husu ita hotu atu partisipa ho didi’ak, hatudu nu’udar ita sidadaun ne’ebé responsável, sarani ne’ebé di’ak atu hola parte iha festa demokrasia ne’e ho responsabilidade”, husu Isabel Fereira, reprezentate SHD liuhusi jornalista sira iha semináriu ISFIT.

Isabel husu nafatin ba timoroan tomak respeita malu, kria ambiente ida pás, nakonu ho domin hodi prepara án iha eleisaun antesipada.

Nune’e mós, nia husu ba partidu polítiku sira atu fó ezemplu ne’ebé di’ak ba militante, simpatizante no apoiante sira.

“Mensajen ne’ebé edukativu atu bele partisipa iha kampaña ho di’ak, nune’e mós enkoraja militante sira atu hatene respeita malu, espiritu solidariedade, unidade no toleránsia ba malu”, Isabel Ferreira fó hanoin.

Reitór ISFIT, Padre Domingos Alves, hatutan ISFIT organiza semináriu ho tema relasiona ho eleisaun nu’udar maneira hodi sidadaun idaidak partisipa mós iha prosesu dame ninian.

“Ita hanesan sidadaun labele hakmatek de’it, haree de’it, ita mós tenke sai partisipante ativu iha polítika”, dehan reitór ISFIT, Pe. Domingos Alves.

Reitór espera katak ho semináriu ne’e bele loke tan estudante sira-nia hanoin, orizonte, atu buat ne’ebé sira hanoin aplika ba realidade, liliu konstrui dame.

“Ha’u-nia esperansa mak ha’u-nia estudante sira sei aumenta tan sira-nia kapasidade atu bele enfrenta situsaun oioin, liliu haree ba eleisaun nomós ba prosesu polítiku ne’ebé sei tuir mai depois eleisaun antesipada kona-ba governu ida ne’ebé de’it mak atu mosu mai”, espera reitór ISFIT.

Hodi hatutan: “Ita tenke tuir nafatin la’o tuir nafatin atu bele halo krítika, bele halo proposta ba buat ne’ebé governu halo la tuir dalan”.

Partisipa iha semináriu ne’e, alende estudante ISFIT, partisipa mós husi estudante no reprezentante universidade sira seluk iha Dili.

Jornalista: Rafy Belo

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here