dr. Daniel Murphy bainhira halo konsulta médika ba pasiente iha Klínika Bairro Pité. Foto google

DILI, (TATOLI) – Fundadór klínika Bairru Pité, dr. Daniel Murpy, hateten iha esperansa boot sei la taka klínika Bairru Pité, tanba sei fó impaktu ba povu kiak sira ne’ebé presiza halo tratamentu maske hasoru krize finanseira.

Murphy esplika krize ne’e akontese hafoin doadór hosi Austrália hapara sira nia apoiu, tanba diferénsia hanoin ne’ebé mosu entre fundadór klínika no membru meza diretiva hosi Austrália.

“Fulan lima ka neen liubá iha problema ho membru meza diretiva hosi Austrália, sira la kontente ho klínika Bairru Pité, tanba hakarak domina iha klínika ne’e hodi hanehan timoroan tanba ne’e maka mosu problemaʺ, haktuir dr. Daniel ba Tatoli iha ninia servisu fatin, ohin.

Ho situasaun ne’e, klínika falta aimoruk, laiha salariu ba médiku, parteira no enfeirmeiru hodi rezulta ema 20 resin tenke para servisu.

“Aimoruk agora menus liu, anti-biotika forte ha’u laiha, paracetamol iha maibé aimoruk barak ha’u laihaʺ, haktuir.

Alende ne’e maioria atendementu ba pasiente tuberkulosis, HIV-AIDS, partus, falta nutrisaun no moras seluk tenke transfere ba Ospitál Nasionál Guido Valadares, Sentru Saúde Komoro, Bekora no Villa Verde.

ʺAmi iha kama 50 maibé agora mamuk tanba laiha ema atu fó tratamentu ba pasiente sira iha tempu kalan, tanba médiku sira la simu saláriu durante fulan rua onaʺ, konta tan.

Klínika ne’ebé harii iha setembru 1999 hetan apoiu hosi doadór sira hosi Amerika, Portugal, Inglatera, Irlándia, Austrália no sira seluk.

Enkuantu Governu konstitisional da-haat apoiu finanseira kada fulan rihun 15 maibé depois tama governu da-lima to’o ohin loron la fó apoiu.

“Tinan ualu liubá maka governu fó apoiu kada fulan rihun 15, maibé governu tuir mai to’o agora la fó apoiuʺ, realsa.

Fundadór klínika ne’e hatutan hafoin akontese krize finanseira ne’e, kontaktu kedas ninia família, doadór hosi Portugal, Inglatera, Irlándia no nasaun seluk tan pronto atu fó apoiu.

Nia konta tan timoroan balun mós hahú fó apoiu hanesan foos, mina no orsamentu ba klínika ne’e atu re-ativa funsionamentu.

ʺHa’u nia esperansa maka hetan rekursu finanseira atu klínika bele la’o di’akʺ, dehan Murpy.

Situasaun ne’e, Primeiru-Ministru, Marí Alkatiri, Xanana Gusmão, José Ramos Horta no sira seluk visita hodi haree kondisaun klínika ne’e maibé seidauk iha resposta atu apoia.

ʺAmi hatama proposta maibé sira hatan situasaun governu agora krize tanba ne’e laiha respostaʺ, tenik.

Jornalista: Agapito dos Santos

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here