Prezidente CNE, Alcino Barris. Foto Egas Cristovao

DILI, (TATOLI) – Komisaun Nasionál Eleisaun (CNE-sigla portugés), fó sai ona kalendáriu kampaña eleitorál ba públiku atu partidu polítiku sira bele hatene sira nia oráriu loloos tantu hosi Partidu Polítiku no Koligasaun Partidu.

“Ami ohin anúnsia ba públiku kona-ba kalendáriu kampaña, partidu polítiku sira informadu hotu ona no sei distribui ba seguransa sira atu hatene hodi halo akompañamentu ba prosesu kampaña”, Prezidente CNE, Alcino Barris, ba Tatoli iha salaun Larigutu CNE Kaikoli, ohin.

Hosi kalendáriu ne’e  partidu boot sira hanesan Partidu Demokráriku (PD) hahú kampaña iha Rejiaun Administrativu Espesiál Oe-kusi Ambeno (RAEOA), postu administrativu Pante Makasar no fatin kampaña iha Merkadu Tono.

Enkuantu tipu kampaña ho kampaña públiku no kampaña ikus iha munisípiu Dili, postu administrativu Dom Aleixo, lugar kampaña Tasi Tolu, kampu futeból Dom Bosco ho tipu kampaña públiku.

Entretantu Frente Revolusionária Timor-Leste Independente (FRETILIN) inisia kampaña iha munisípiu Manatutu, postu administrativu Manatutu no lugar Ex-Merkadu Manatutu ho tipu kampaña komísiu no sei remata iha Dili, Dom Alexo, fatin Tasi Tolu ho modelu kampaña komísiu.

Aliansa Mudansa ba Progresu (AMP) abertura kampaña iha munisípiu Ainaru, postu administrativu Ainaru no fatin kampaña kampu futeból ho tipu kampaña komísiu, finál iha Dili, postu administrativu Atauro, Dom Aleixo Nai-Feto, fatin iha kampu aviasaun Manleuana Aituri Laran Taibesi ho mini kampaña.

Nune’e mós partidu sira seluk hanesan Partidu Esperansa Pátria (PEP), Partidu Repúblikanu (PR), Frente Dezenvolvimentu Demokrátiku (FDD), Movimentu Sosiál Demokráta (MSD), Movimentu Dezenvolvimentu Nasionál (MDN).

Antes ne’e, partidu polítiku sira no koliagasaun partidária ida-idak obrigatóriamente submete kalendáriu kampaña ba CNE loron lima molok períodu kampaña, haktuir ba artigu 10, dekretu Governu númeru 18/2017.

Hanesan segimentu ba dekretu Governu refere, iha loron 29 marsu to’o 3 abril, partidu polítiku sira no koligasaun partidária konsege hato’o kalendáriu mai CNE.

Iha loron 4 abril, CNE halo verifikasaun ba kalendáriu hirak ne’e, konsege detekta koinsidénsia relasiona fatin no oras kampaña hosi partidu no koligasaun partidária sira. Relasiona ho koinsidénsia refere, iha 5 abril CNE konvida reprezentante partidu no koligasaun partidária sira hodi buka solusaun no hetan konkordánsia entre partidu sira no hosi sorteiu, nune’e CNE bele produz kalendáriu kampaña eleitorál.

Jornalista: Zezito Silva

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here